(កណ្តាល)៖ លោក ម៉ក់ ពេជ្ជរិទ្ធ អនុប្រធានទី១នៃក្រុមការងារ CPP ចុះជួយស្រុកកៀនស្វាយ និងជាប្រធានក្រុមការងារ CPP ចុះជួយឃុំដីឥដ្ឋ និងឃុំភូមិធំ ក្នុងពេលចុះ​មូលដ្ឋាន នៅថ្ងៃទី២៥ ខែធ្នូ ឆ្នាំ២០១៦នេះ បានថ្លែងថា មេភូមិ-មេឃុំ ត្រូវធ្វើជាខ្នងបង្អែកដ៏រឹងមាំ សម្រាប់បម្រើប្រជាពលរដ្ឋក្នុងមូលដ្ឋាន និងបន្តចុះដោះស្រាយបញ្ហា​នានា​ជូនពួកគាត់ ឲ្យដូចភ្លៀងរលឹម។

នៅចំពោះមុខក្រុមការងារ និងប្រជាពលរដ្ឋនៅភូមិរទាំងខាងត្បូង ឃុំភូមិធំ ស្រុកកៀនស្វាយ ប្រមាណ៦០០នាក់ លោក ម៉ក់ ពេជ្ជរិទ្ធ បានបញ្ជាក់ថា ក្រុមការងារ​របស់គណ​បក្សប្រជាជនកម្ពុជា ចុះមកជួបសំណេះសំណាលជាមួយប្រជាពលរដ្ឋ នាពេលនេះ  គឺដើម្បីស្វែងយល់ពីទុក្ខលំបាករបស់ប្រជាពលរដ្ឋ និងដោះស្រាយ​រាល់សំណូមពរ​ជូនប្រជាពលរដ្ឋ មិនមែនចុះមកដើម្បីសន្យា ហើយមិនធ្វើនោះទេ។

លោកបានបន្តថា «ទុក្ខលំបាករបស់ប្រជាពលរដ្ឋ គឺជាទុក្ខលំបាករបស់អាជ្ញាធរ និងក្រុមការងារចុះជួយមូលដ្ឋាន បើប្រជាពលរដ្ឋមានបញ្ហាអ្វី នៅក្នុងគ្រួសារ សូមនិយាយឲ្យត្រង់ទៅត្រង់មក កុំខ្លាចរអែងអី ដើម្បីឲ្យក្រុមការងាររបស់គណបក្សប្រជាជន បានដឹង និងដោះស្រាយជូនទាន់ពេលវេលា»។

លោកបានបន្ថែមថា ការចុះជួបប្រជាពលរដ្ឋមូលដ្ឋានជាប្រចាំនេះ គឺអនុវត្តតាមអនុសាសន៍ណែនាំរបស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធាន​គណបក្សប្រជាជនកម្ពុជា ដែលជានិច្ចកាលតែងតែផ្តាំផ្ញើដល់ក្រុមការងា ត្រូវចុះតាមមូលដ្ឋានដោះស្រាយសំណូមពររបស់ប្រជាពលរដ្ឋ មិនឲ្យប្រជាពល​រដ្ឋណាម្នាក់ស្រេក​ឃ្លាន នោះឡើយ។

លោកថា «អ្វីដែលសំខាន់នោះ សូមលោកមេភូមិ-មេឃុំ ត្រូវចុះជាប់ជាប្រចាំ ក្តាប់ព័ត៌មានឲ្យបាន ហើយរាយការណ៍ពីតម្រូវការ និងសំណូមពររបស់​ប្រជាពលរដ្ឋ ដាក់ជូនថ្នាក់ដឹកនាំជាប្រញាប់ ដើម្បីដោះស្រាយឲ្យទាន់ពេលវេលា»។

នៅក្នុងពិធីសំណេះសំណាលនោះ លោក ម៉ក់ ពេជ្ជរិទ្ធ ក៏បានដោះស្រាយនូវទុក្ខកង្វល់របស់ប្រជាពលរដ្ឋ ដែលបានសំណូមពរឲ្យលោកជាប្រធានក្រុមការងារ ជួយដោះ​ស្រាយនូវការតភ្ជាប់បណ្តាញទឹកស្អាត, បញ្ហាខ្វះខាតថវិកាក្នុងការព្យាបាលជំងឺ, បញ្ហាខ្វះមធ្យោបាយជិះទៅសាលារបស់សិស្សានុសិស្ស, បញ្ហាខ្វះថវិកាសម្រាប់​ទិញសម្ភារជួស​ជុលផ្ទះ ជាដើម។

មិនត្រឹមមិនតែប៉ុណ្ណោះ លោក ម៉ក់ ពេជរិទ្ធ ក៏បានផ្តល់នូវអំណោយមួយចំនួន ចែកជូនដល់ប្រជាពលរដ្ឋខាងលើ ផងដែរ ដោយក្នុង១គ្រួសារៗ ទទួលបានមីចំនួន ១កេះ។ ចំពោះស្ត្រីដែល​សម្រាលកូន ក៏ទទួលបានថវិកាចំនួន ២០ម៉ឺនរៀល គ្រប់ក្រុមគ្រួសារទាំងអស់៕