(ភ្នំពេញ)៖ ស្រាបៀរកម្ពុជា សហការជាមួយក្រសួងរៀបចំដែនដី នគរូបនីយកម្ម និងសំណង់ សាងសង់ខ្លោងឆ្នេរក្នុងខេត្តព្រះសីហនុចំនួនប្រាំមួយ ដើម្បីត្រៀមស្វាគមន៍ភ្ញៀវទេសចរណ៍ជាតិ និងអន្តរជាតិ ក្នុងពិធីបុណ្យសមុទ្រខាងមុខនេះ។
ខ្លោងឆ្នេរដែលស្រាបៀរកម្ពុជាឧបត្ថម្ភការសាងសង់ រួមមានខ្លោងឆ្នេរអូរត្រេះ ខ្លោងឆ្នេរអូរឈើទាលច្រកទី២ ខ្លោងឆ្នេរអូរឈើទាលច្រកទី៦ ខ្លោងឆ្នេរអូរឈើទាលច្រកទី៧ ខ្លោងឆ្នេរកោះពស់ និងខ្លោងឆ្នេរពយកំពេញ។
លោកឧកញ៉ា លាង ឃុន ប្រធានអគ្គនាយកក្រុមហ៊ុនខ្មែរប្រ៊ូវើរីលីមីតធីត ដែលផលិតស្រាបៀរកម្ពុជា បានមានប្រសាសន៍ថា ខ្ញុំសង្ឃឹមថាខ្លោងឆ្នេរ ដែលក្រុមហ៊ុនបានចូលរួមសហការសាងសង់នេះ នឹងជួយលើកសម្រស់ឆ្នេរសមុទ្រកម្ពុជាឲ្យកាន់តែស្រស់ស្អាត និងជួយទាក់ទាញភ្ញៀវទេសចរណ៍ឲ្យមកកម្សាន្តនៅខេត្តព្រះសីហនុ ជាពិសេសក្នុងពិធីបុណ្យសមុទ្រឲ្យបានច្រើនកុះករ។
ក្រៅពីស្វាគមន៍ពិធីបុណ្យសមុទ្រឆ្នាំនេះ ការចូលរួមសាងសង់ក្លោងឆ្នេរសមុទ្រ ក៏ជាការរួមចំណែកក្នុងកិច្ចប្រឹងប្រែងរបស់ថ្នាក់ដឹកនាំ ក្នុងការកែលម្អសោភ័ណភាពតំបន់ឆ្នេរផងដែរ។ ខ្លោងឆ្នេរជាច្រើនត្រូវបានកសាងនៅតាមតំបន់ឆ្នេរ ដោយមានការចូលរួមគាំទ្រពីស្ថាប័នឯកជនជាច្រើន ដែលនេះជាការបង្ហាញពីការចូលរួមយ៉ាងសកម្ម ពីវិស័យឯកជនក្នុងការអភិវឌ្ឍ តំបន់ឆ្នេរ។
ពិធីបុណ្យសមុទ្រនឹងប្ររព្ធឡើងនៅថ្ងៃទី២៣ ដល់ថ្ងៃទី២៥ ខែធ្នូ ខាងមុខនេះ។ ក្រៅពីចូលរួមជាមួយក្រសួងកសាងខ្លោងឆ្នេរ ស្រាបៀរកម្ពុជាក៏ជាអ្នកឧបត្ថម្ភធំក្នុងពិធីបុណ្យសមុទ្រនេះដែរ៕
