(ភ្នំពេញ)៖ រដ្ឋាភិបាលប្រទេសជប៉ុន កំពុងពិនិត្យលើការផ្តល់ជំនួយដល់ គម្រោងហេដ្ឋារចនាសម្ព័ន្ធចំនួន៣ថែមទៀត នៅក្នុងប្រទេសកម្ពុជា។ នេះបើតាមការបញ្ជាក់ពីមន្រ្តីក្រសួងសាធារណការ និងដឹកជញ្ជូនកម្ពុជា។

លោកទេសរដ្ឋមន្ត្រីស៊ុន ចាន់ថុល នៅព្រលប់ថ្ងៃទី២០ ខែធ្នូ ឆ្នាំ២០១៦ បាននិងកំពុងជួបពិភាក្សាការងារជាមួយ លោក Harry H. Horinouchi ឯកអគ្គរាជទូតជប៉ុនប្រចាំកម្ពុជា នៅទីស្តីការក្រសួង​សាធារណការ និងដឹកជញ្ជូន ដើម្បីពិភាក្សាអំពីកិច្ចសហប្រតិបត្តិការ និងការផ្តល់ជំនួយរបស់របស់ជប៉ុន ដល់ក្រសួងសាធារណការនិងដឹកជញ្ជូន។

គម្រោងហេដ្ឋារចនាសម្ព័ន្ធមួយចំនួន ដែលជប៉ុនកំពុងពិនិត្យនេះរួមមាន៖ ការស្តារស្ពានជ្រោយចង្វារឡើងវិញ ការពង្រីកផ្លូវជាតិលេខ៥ពី២គន្លងទៅ៤គន្លង ការសាងសង់កំពង់ផែកុង​តឺន័រថ្មីនៅ​ក្នុងខេត្ត​ព្រះ​សីហនុ។ លើសពីនេះទៀត ទីភ្នាក់ងារសហប្រតិបត្តិការអន្តរជាតិជប៉ុន (JICA) កំពុងសិក្សាលទ្ធភាពអនុវត្តគម្រោងប្រព័ន្ធប្រតិបត្តិការរថភ្លើងស្វ័យប្រវត្ត(AGT)ពីភ្នំពេញ ទៅព្រលានយន្តហោះ។

លោកទេសរដ្ឋមន្រ្តី ស៊ុន ចាន់ថុល បានថ្លែងអំណរគុណដល់ ឯកអគ្គរដ្ឋទូត Horinouchi ដែលបានផ្តល់ការគាំទ្រចំពោះប្រព័ន្ធទិន្ន័យគ្រប់ការដំណើការការងារកំពង់ផែ EDI និងការកសាងសមត្ថភាព​មន្ត្រីរាជការ​ក្រសួងសាធារណការនិងដឹកជញ្ជូន៕