(ភ្នំពេញ)៖ ស្ថានអគ្គកុងស៊ុលកម្ពុជា ប្រចាំទីក្រុងសៀងហៃ បានសហការជាមួយអាជ្ញាធរចិន អន្តរាគមន៍ជួយនារីខ្មែរ៣នាក់ ដែល មេខ្យល់បោកបញ្ឆោតយកទៅរៀបការជាមួយបុរសជនជាតិចិន ឲ្យបានត្រឡប់មកកម្ពុជាវិញដោយ សុវត្ថិភាព។ នេះបើយោងតាម សេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ចុះថ្ងៃទី២០ ខែធ្នូ ឆ្នាំ២០១៦នេះ។

យោងតាមសេចក្តីប្រកាសព័ត៌មានដដែល បានបញ្ជាក់ឲ្យដឹងថា នារីទាំង៣នាក់ បានមកដល់ព្រលានយន្តហោះអន្តរជាតិភ្នំពេញ នៅថ្ងៃទី១៨ ខែ ធ្នូ ឆ្នាំ ២០១៦ វេលាម៉ោង២៣៖១៥នាទី តាមជើងយន្តហោះMU759 ។ អំឡុងពេលរង់ចាំមកកម្ពុជាវិញ ស្ថានអគ្គកុងស៊ុល បានរ៉ាប់រងផ្តល់កន្លែងស្នាក់នៅនិងអាហារបរិភោគ ដល់នារីរងគ្រោះទាំង៣នាក់ផងដែរ។  

នារីខ្មែររងគ្រោះទាំង៣នាក់រួមមាន ទី១ ឈ្មោះ ឆ.ព អាយុ២៧ឆ្នាំ មកពីខេត្តកំពង់ចាម ទី២ ឈ្មោះ ធ.ម.ល អាយុ១៦ឆ្នាំ មកពីខេត្តកំពង់ចាម និងចុងក្រោយឈ្មោះ ស.ដ.ន អាយុ២៦ឆ្នាំ មកពីខេត្តព្រៃវែង។

ជាមួយគ្នានោះដែរ ក្រសួងការបរទេស និងសហប្រតិបត្តិការអន្តរជាតិ សូមអំពាវនាវដល់ពលរដ្ឋខ្មែរទាំងអស់សូមមានការ ប្រុងប្រយ័ត្នឲ្យបានខ្ពស់ ចំពោះមេខ្យល់ឬជនណាដែលប្រើលាភសក្ការៈ ដើម្បីអូសទាញ បញ្ចុះបញ្ចូល និងបោកបញ្ឆោត  ប៉ុនប៉ងយកទៅរៀបការជាមួយជនបរទេស ឬធ្វើការខុសច្បាប់នៅតាមប្រទេសនានា៕