(ភ្នំពេញ)៖ នៅឆ្នាំ២០១៥ គណបក្សសង្គ្រោះជាតិ បានប្រកូកប្រកាសរៃអង្គាសលុយពីប្រជាជន សុំផង ប្រកាសលក់ភាគហ៊ុនផងដើម្បី ប្រមូលលុយតាមគ្រប់រូបភាព និងតាមគ្រប់មធ្យោបាយថា ដើម្បីយកទៅធ្វើទូរទស្សន៍។ ២ឆ្នាំបានកន្លងផុតទៅហើយ ! តើលុយដែលជា ញើសរបស់ឈាមប្រជាជន នៅទីណា? តើលុយ នៅសល់ប៉ុន្មាន? ហើយឯណាទូរទស្សន៍ដែលថា នឹងកើតក្នុងឆ្នាំ២០១៦?
តាមរយៈគម្រោងធ្វើទូរទស្សន៍នេះ ពិតជាអាចឆ្លុះបញ្ចាំងយ៉ាងច្បាស់ពីអសមត្ថភាពរបស់លោក សម រង្ស៊ី ផងនិងភាពកំសោយរបស់ គណបក្សសង្គ្រោះជាតិផង។ ពូកែណាស់លើការរិះគន់កម្ទេច! តែដល់សាច់ការដែលជាការទទួលខុសត្រូវរបស់ខ្លួនឯងវិញ គឺមិនផេះទេ។
បើគ្រាន់តែទូរទស្សន៍មួយ ចាត់ចែងមិនច្បាស់លាស់ និងធ្វើមិនចេញជាសាច់ការអ្វីផង តើមានសមត្ថភាពអ្វី នឹងស្រមៃទៅដឹកនាំកិច្ចការ ប្រទេសជាតិរាប់ម៉ឺនជំពូក? សូមមេត្តាកុំយកលេសថា គេលើកយករឿងនេះមកវាយប្រហារ ប៉ុន្តែនេះវាបង្ហាញអំពីភាពអសមត្ថភាព របស់សង្គ្រោះជាតិ ដែលសូម្បីតែការចាត់ចែង ការងារតូចមួយសោះមិនកើតផងនោះ។
បក្សសង្គ្រោះជាតិ រួមទាំងទណ្ឌិត សម រង្ស៊ី និងលោក កឹម សុខា ផង គួរទទួលស្គាល់ថា ខ្លួនគ្មានសមត្ថភាពចាត់ចែង គ្មានធនធានមនុស្ស ហើយក៏ត្រូវតែហ៊ានបង្ហាញភាពខ្មាសអៀនក្នុងជីវិតជាចំហរថា ការងារទូរទស្សន៍តូចមួយនេះគឺបរាជ័យហើយ?
ប្រជាជនកម្ពុជា ក៏មានការវិនិច្ឆ័យរួចហើយដែរថា សមត្ថភាពនិងការដឹកនាំ គឺគេវាយតម្លៃលើលទ្ធផលជាក់ស្តែង មិនមែននៅលើលេស និងការសន្យាខ្យល់ និងការដោះសារនោះទេ។ តើមេដឹកនាំសង្គ្រោះជាតិ ជានិមិត្តរូបនៃមនុស្សបោកប្រាស់ និងចោលម្សៀតគ្មានបានការឬ?
សូមកុំភ្លេច! ដើម្បីកុំឲ្យមានកម្មពារវេរាឆ្លងទៅជាតិក្រោយ ហើយបើធ្វើទូរទស្សន៍មិនកើត ត្រូវតែសងលុយដែលជាញើសឈាម ឲ្យមកប្រជាជនវិញឲ្យគ្រប់ចំនួន៕
ដោយ៖ សេនាជាតិ
