(តាកែវ)៖ អភិបាលខេត្តតាកែវលោក ឡាយ វណ្ណៈ បានប្រកាសប្រាប់ទៅឲ្យអ្នកវិនិយោគ និងអ្នកដេញថ្លៃភាស៊ីផ្សារទូទាំងខេត្តតាកែវ បញ្ឈប់ជាបន្ទាន់ ចំពោះការយកភាស៊ីពីបងប្អូនប្រជាពលរដ្ឋលក់ដូរតាម កញ្ជ្រែង កញ្ជើ ល្អី និងអ្នកលក់ដូរក្រីក្រតូចតាចនៅតាមផ្សារនានាទូទាំងខេត្តតាកែវ។
លោកអភិបាលខេត្ត បានជួបប្រជុំជាមួយអភិបាលក្រុង-ស្រុកទាំង១០ ប្រធានមន្ទីរជុំវិញខេត្ត រួមនឹងអ្នកវិនិយោគ និងអ្នកដេញភាស៊ីផ្សារ នាព្រឹកថ្ងៃទី១៥ ខែធ្នូ ឆ្នាំ២០១៦នេះ ដើម្បីផ្សព្វផ្សាយពីសារាចរណ៍របស់រាជរដ្ឋាភិបាលស្តីពីការលុបការបង់ថ្លៃ ចំពោះប្រជាពលរដ្ឋលក់ដូរតាមកញ្ជ្រែង កញ្ជើ និងល្អី។
លោក ឡាយ វណ្ណៈ បានថ្លែងថា បន្ទាប់ពីកិច្ចប្រជុំនេះចប់ អភិបាលគ្រប់ក្រុង ស្រុក ត្រូវតែកោះប្រជុំភ្លាមជាមួយ នឹងបងប្អូនអ្នកវិនិយោគ និងអ្នកដេញភាស៊ីផ្សារតាមមូលដ្ឋានរបស់ខ្លួន ដើម្បីផ្សព្វផ្សាយសារាចរណ៍នេះ ឲ្យបានទូលំទូលាយ ពិសេសគឺការបិទសារាចរណ៍នេះតាមទីផ្សារឲ្យបានធំៗ ដើម្បីឲ្យបងប្អូនអាជីវករបានឃើញ និងយល់ជ្រួតជ្រាបពីការលុបការបង់ថ្លៃចំពោះប្រជាពលរដ្ឋលក់ ដូរតាមកញ្ជ្រែង កញ្ចើ ល្អី។
លោកថ្លែងថា «សារាចរនេះ មានប្រយោជន៍ខ្លាំងណាស់ចំពោះបងប្អូនប្រជាពលរដ្ឋក្រីក្ររបស់យើង។ ដូច្នោះយើងទាំងអស់គ្នាត្រូវអនុវត្តឲ្យបាន»។
នៅក្នុងឱកាសនោះលោក ឡាយ វណ្ណៈ ក៏បានបញ្ជាឲ្យអភិបាលក្រុង-ស្រុកទាំងអស់ ត្រូវតែចុះត្រួតពិនិត្យជាប់ជាប្រចាំផងដែរ នៅតាមផ្សារក្នុងមូលដ្ឋានរបស់ខ្លួន ពីការអនុវត្តសារាចររបស់រាជរដ្ឋាភិបាលនេះ។
លោកថ្លែងថា «បើមានប្រជាពលរដ្ឋណាម្នាក់ លើកឡើងឡើងនៅក្នុងហ្វេសប៊ុករបស់សម្ដេចតេជោ ហ៊ុន សែន ពាក់ព័ន្ធទៅ និងអ្នកដេញថ្លៃភាស៊ីផ្សារ នៅតែបន្តយកភាស៊ីពីបងប្អូនលក់តាមកញ្រែង ល្អី កញ្ជើ អភិបាលស្រុកនោះ ជាអ្នកទទួលខុសត្រូវផ្ទាល់ខ្លួនតែម្ដង។ ព្រោះរាជរដ្ឋាភិបាលបានចេញ សារាចរណែនាំរួចហើយ ហើយខ្ញុំក៏បានហៅមកប្រជុំប្រាប់រួចរាល់ហើយដែរ»៕
