(ភ្នំពេញ)៖ តារាសម្ដែង តារាចម្រៀង តារាកំប្លែង ល្បីៗជាច្រើនដួង បានមូលមកជុំគ្នាយ៉ាងកកកុញ ក្នុងថ្ងៃបើកសម្ពោធ ដាក់បញ្ចាំង រឿង «កំពូលល្ងង់នៅអាស៊ី» នាល្ងាច​ថ្ងៃទី១៤ ខែធ្នូ ឆ្នាំ២០១៦នេះ នៅ​រោងភាពយន្ត Major Cineplex ផ្សារទំនើប អេអនម៉ល ដែលជាស្នាដៃបែបកំប្លែង លើកដំបូង​របស់ផលិតកម្ម «Galaxy» ខណៈដែលផលិតករ ក្នុង​ផលិតកម្មថ្មី​មួយនេះ បានបង្ហាញពីក្ដីរំពឹងខ្ពស់ ថានឹងទទួលបានជោគជ័យ លើស្នាដៃទី១របស់ខ្លួន។

លោក ឡេង ណាវ៉ាត់ត្រា ម្ចាស់ផលិតកម្ម «Galaxy» បានថ្លែងប្រាប់ឲ្យបណ្ដាញ​អ្នកសារព័ត៌មានដឹងថា លោកពិតជាមានក្តីរំ​ភើប នឹងវត្តមានរបស់​សិល្បករ-សិល្បការិនី ក្មេងចាស់ប្រុសស្រី​ជាច្រើននាក់ ក្នុងឱកាសនេះ ដែលពួកគេបានមកចូលរួម បញ្ជាក់ពីការលើកទឹកចិត្ត និងគាំទ្រស្នាដៃរបស់កូនខ្មែរ។ ​វាគឺជាកម្លាំងចិត្តសម្រាប់លោក និងក្រុមការងារបន្តការខិតខំ ប្រឹងប្រែងទៀត សម្រាប់ខ្សែភាពយន្ត និងស្នាដៃសិល្បៈ​ បន្តបន្ទាប់ទៀត។

ចាងហ្វាងផលិតកម្មវ័យក្មេង និងធ្លាប់ឆ្លងកាត់ជីវិតជាពលករ​ធ្វើការនៅប្រទេសកូរ៉េ រូបនេះ បានបន្តទៀតថា ចាប់ពីថ្ងៃទី១៥ធ្នូ នេះតទៅខ្សែរឿង «កំពូលល្ងង់នៅអាស៊ី» នឹងត្រូវបាន​ចាក់បញ្ចាំង នៅគ្រប់រោងភាពយន្ត​ទំនើបទាំងអស់។ ក្រៅពីការប្រកាសនេះ លោកក៏បង្ហាញពីក្តីរំពឹងខ្ពស់ ក្នុង​ការទទួលបានអ្នកគាំទ្រច្រើន ចូលទស្សនាខ្សែភាពយន្ត ​ជាស្នាដៃដំបូងរបស់ផលិតកម្ម ព្រោះតែខ្សែភាពយន្តនេះ ប្រមូលផ្តុំដោយសិល្បករ​ ផលិតករ ដែលមានបទពិសោធន៍ និងប្រជាប្រិយភាពខ្ពស់។ ជាពិសេស​ទាំងបច្ចេកទេសថត និងខ្លឹមសារនៃសាច់រឿង ពិតជាធ្វើឲ្យអ្នកទស្សនា ទទួល​បានភាពសប្បាយរីករាយ និងកម្សត់ រន្ធត់ជាក់ជាមិនខាន។

សូមបញ្ជាក់ថា ព្រឹត្តិការណ៍សម្ពោធទ្រង់ទ្រាយធំ​ ត្រូវបានធ្វើឡើងមុនពេលខ្សែភាពយន្តនេះ ត្រូវបានចាក់បញ្ចាំងជាផ្លូវការ​ នៅថ្ងៃទី១៥ ខែធ្នូ ឆ្នាំ២០១៦។ ក្នុងថ្ងៃសម្ពោធ គេបានឃើញ ការបង្ហាញឈុតឆាកខ្លីៗ វត្តមានតារាសម្តែង ក្នុងខ្សែភាពយន្តខាងលើ ការបង្ហាញវត្តមានក្រុមការងារ​ផ​លិត និងសម្តែងសមត្ថភាពសិល្បៈ ត្រូវបានធ្វើឡើង ដើម្បីបង្កើនការចាប់អារម្មណ៍ ពីមហាជន។ ក្នុងនោះ តារាល្បីៗលំដាប់ប្រទេស ត្រូវបានអញ្ជើញ​ចូលរួមយ៉ាងច្រើនកុះករ ដើម្បីជាការលើកទឹកចិត្ត និងចូលទស្សនា ទាំងអស់គ្នា។

​រឿង «កំពូលល្ងង់នៅអាស៊ី» ជាប្រភេទរឿងមនោសញ្ចេតនា បែបកំប្លែងទំនើប ​ប្រជុំទៅដោយតារាល្បីៗ​ជាច្រើន មានដូចជា នាយ ពែកមី នាយ គ្រឿន នាយកណ្ដុរ លោក ម៉ារ៉ា ប៊ុណ្ណា កញ្ញា រីយ៉ា ជាដើម។ ខ្សែភាពយន្តនេះត្រូវបានចំណាយដើមទុន ក្នុងការផលិតប្រមាណ៦ម៉ឺន ដុល្លារអាមេរិក៕