(ភ្នំពេញ)៖ សមាគមសិល្បករខ្មែរ ដឹកនាំដោយលោក សុះ ម៉ាច ប្រធានសមាគម បាននាំយកថវិកា ដើម្បីផ្ដល់ជូនដល់មូលដ្ឋាន កុមារកំព្រា ក្នុងបុរីកុមា ដែលមានអាសយដ្ឋានស្ថិតជាប់នឹងសាលាបឋមសិក្សា ទូលស្លែង ក្នុងសង្កាត់ទូលស្វាយព្រៃទី២ ខណ្ឌចំការមន ក្នុងន័យជួយសម្រាលទុក្ខលំបាករបស់ក្មួយៗ ដែលកំពុងស្នាក់នៅ និងសិក្សា ក្នុងមូលដ្ឋាននេះផ្ទាល់។
លោក សុះ ម៉ាច ប្រធានសមាគមសិល្បករខ្មែរ បានថ្លែងឲ្យដឹងថា នៅថ្ងៃនេះ ខាងសមាគមបាននាំយកថវិកា ដែលបានមកពីសប្បុរសជននានា ជួយឧបត្ថម្ភដល់ បុរីកុមារ ដើម្បីជាការជួយសម្រាលទុក្ខលំបាក ដែលកុមារនៅទីនេះ ដែលកំពុងជួបប្រទះនូវការខ្វះខាត។ ថវិកាបន្តិចបន្តួចនេះ វាមិនបានជួយសម្រួលទុក្ខលំបាក ជារៀងរហូតនោះទេ ប៉ុន្តែក្នុងនាមជាខ្មែរដូចគ្នា យើងត្រូវតែចេះជួយចែករំលែក ការលំបាករបស់គ្នាទៅវិញទៅមក បានមួយគ្រា និងជាផ្នែកមួយ ចូលរួមក្នុងសង្គម ផងដែរ។
លោក សុះ ម៉ាច ក៏បានផ្ដាំផ្ញើទៅដល់ប្អូនៗ ក្មួយៗ ជាកុមារនៅក្នុងមណ្ឌល បុរីកុមា ជិត១០០នាក់ នេះ ត្រូវខិតខំរៀនសូត្រ ក្រេបយកចំណេះដឹង ស្ដាប់ដំបូន្មានលោកគ្រូ អ្នកគ្រូ និងត្រូវជៀសឲ្យឆ្ងាយពីគ្រឿងញៀន ដែលអាចបំផ្លាញអនាគតរបស់ក្មួយៗ។
សូមបញ្ជាក់ថា សមាគមសិល្បករខ្មែរ ជារឿយៗ តែងតែនាំយកថវិកា ជួយឧបត្ថម្ភដល់បងប្អូនក្រីក្រ និងអ្នកសិល្បៈបាត់បង់សមត្ថភាព ឬកំពុងមានជំងឺជាដើម។ ប៉ុន្តែពេលនេះ សមាគមសិល្បករខ្មែរ បាននាំយកថវិកា១លានរៀល ដើម្បីជូនដល់ បុរីកុមារ ដើម្បីរំលែកការលំបាក បានមួយគ្រា៕
