(ពោធិ៍សាត់)៖ បុរសម្នាក់ ខឹងប្រពន្ធទៅវត្តភ្លេចមកផ្ទះ ពេលប្រពន្ធត្រឡប់មកផ្ទះវិញ ប្រពន្ធស្តីបន្ទោសតបទៅវិញ ក៏តូចចិត្តយកដែកកេសដុតផ្ទះ​របស់ខ្លួនឆេះម៉ត់គ្មានសល់ បានកើតឡើង កាលពីនៅវេលាម៉ោង០១៖១២នាទីរសៀល ថ្ងៃទី១៣ ខែធ្នូ ឆ្នាំ២០១៦ នៅក្នុងភូមិថ្កោលធំ ឃុំអន្សាចំបក់ ស្រុកក្រគរ​ខេត្តពោធិ៍សាត់។

លោក ឯម រុន អធិការនគរបាលស្រុកក្រគរ បានប្រាប់ភ្នាក់ងារ Fresh News ឲ្យដឹងថា មុខសញ្ញាដែលដុតផ្ទះខ្លួនឯងទំហំ ៣,៥ម៉ែត្រx២,៥ម៉ែត្រ សរសរ​ស្រឡៅដំបូងនិងជញ្ជាំងស្លឹក ក្រាលក្តារ អង្ករ ១០គីឡូក្រាម លុយខ្មែរ ៤ម៉ឺនរៀល សៀវភៅគ្រួសារ អត្តសញ្ញាណប័ណ្ណ ប័ណ្ណចុះឈ្មោះបោះឆ្នោត និងសម្ភារៈដែលមានក្នុងផ្ទះមួយចំនួនទៀតនោះ មានឈ្មោះ ញ៉ែម ទឹម អាយុ ៤៩ឆ្នាំ ជនជាតិខ្មែរ មានប្រពន្ធឈ្មោះ យន មុំ អាយុ ៤៨ឆ្នាំ ជនជាតិខ្មែរ មានកូនក្នុងបន្ទុក២នាក់ ក្នុងនោះស្រីមួយនាក់។

លោកអធិការបានបន្តថា មុននឹងឈានដល់ការដុតផ្ទះខាងលើ បុរសជាប្តី​តែងតែស្តី​បន្ទោសឲ្យ​ប្រពន្ធ រឿងប្រពន្ធទៅវត្ត​ខកខាន​មកផ្ទះ​ជាច្រើន​ថ្ងៃ ហើយថ្ងៃកើតហេតុនេះផ្ទាល់ ប្រពន្ធបានវិលត្រឡប់មកផ្ទះវិញ រួចស្តីបន្ទោសតបទៅប្តីវិញ ទើបធ្វើឲ្យបុរសជាប្តីខឹងតូចចិត្តនឹងប្រពន្ធ យកដែកកេសដែល​សៀតជាប់ខ្លួនដុតផ្ទះខ្ទេច​គ្មានសល់។

ករណីអំពើហឹង្សាក្នុងគ្រួសារនេះ មុខសញ្ញាដៃដល់យើងបានឃាត់ខ្លួនមកអប់រំ នៅអធិការដ្ឋាននគរបាលស្រុកក្រគរ៕