(ភ្នំពេញ)៖ សម្ដេចកិត្ដិព្រឹទ្ធិបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅរសៀលថ្ងៃទី១៣ ខែធ្នូ ឆ្នាំ២០១៦នេះ បានប្រសាសន៍ថា យើងទាំងអស់គ្នា នឹងប្រឹងប្រែង ឲ្យអស់ពីលទ្ធភាព រួមទាំងពង្រឹង និងពង្រីកសកម្មភាពការងារបន្ថែមទៀត ដើម្បីធ្វើយ៉ាងណាជួយសម្រាលរាល់ការលំបាក របស់ប្រជាពលរដ្ឋ យើងឲ្យបានកាន់តែច្រើនទៀត។
សម្ដេចកិត្តិព្រឹទ្ធបណ្ឌិត បានថ្លែងបែបនេះ ក្នុងឱកាសអញ្ជើញជាអធិបតីភាព ក្នុងកិច្ចប្រជុំគណៈកម្មាធិការកណ្តាលកាកបាទក្រហមកម្ពុជា ដែលប្រព្រឹត្តទៅ នៅទីស្នាក់ការកណ្តាល កាកបាទក្រហមកម្ពុជា ដោយបានប្រជុំនេះ ពិភាក្សានិងអនុម័តទៅលើឯកសារ ដែលបានរៀបចំក្នុងនោះមាន៖
១៖ របាយការណ៍សកម្មភាព ឆ្នាំ២០១៦ និងផែនការការងារ ឆ្នាំ២០១៧
២៖ របាយការណ៍ចំណូល-ចំណាយ ឆ្នាំ២០១៦ និងព្យាករណ៍ចំណូលថវិកា ឆ្នាំ២០១៧
៣៖ អនុម័តលើផែនការថវិកាចំណាយជាអាទិភាព ឆ្នាំ២០១៧។
ក្នុងឱកាសនោះដែរ សម្តេចកិត្តិព្រឹទ្ធបណ្ឌិត បានថ្លែងនូវការកោតសរសើរចំពោះថ្នាក់ដឹកនាំមន្ត្រីប្រតិបត្តិ អ្នកស្ម័គ្រចិត្តនិងយុវជនកាកបាទក្រហមកម្ពុជា ទាំងអស់ដែលបានខិតខំបំពេញភារកិច្ចយ៉ាងខ្ជាប់ខ្ជួនក្នុងការជួយសម្រាលការលំបាកដល់ជនរងគ្រោះ និងងាយរងគ្រោះបានទាន់ពេលវេលា និងប្រកបដោយប្រសិទ្ធភាពទៅតាមផែនការប្រចាំឆ្នាំ ដែលបានកំណត់ និងក្នុងកិច្ចការងារក្រៅអាទិភាពជាច្រើនទៀត។
សូមបញ្ជាក់ថា ក្នុងឆ្នាំ២០១៦នេះ កាកបាទក្រហមកម្ពុជាដែលមានសម្តេចព្រះមហាក្សត្រីនរោត្តមមុនិនាថសីហនុព្រះវររាជមាតាជាតិខ្មែរ គង់ប្រថាប់ជាព្រះប្រធានកិត្តិយស និងមានសម្តេចកិត្តិព្រឹទ្ធបណ្ឌិត ប៊ុនរ៉ានីហ៊ុនសែនជាប្រធាន បានជំរុញគ្រប់សកម្មភាពការងារនៃវិស័យស្នូលទាំង៤ ឱ្យប្រតិបត្តិការទៅដោយរលូន និងមានប្រសិទ្ធភាព ដោយបានឆ្លើយតបចំពោះភាពងាយរងគ្រោះ និងរងគ្រោះសរុបចំនួន១៣២.៦៤២គ្រួសារ ក្នុងនោះពីថ្នាក់កណ្តាលចំនួន៥៣.៩៩៨គ្រួសារ ពីថ្នាក់សាខាចំនួន៧៩.៤៦៤គ្រួសារច្រើនជាង ឆ្នាំ២០១៥ ចំនួន៦៣.៩៣១គ្រួសារ៕
