(ពោធិ៍សាត់)៖ យុវជនឈាមរាវ ជិះម៉ូតូDream ស៊េរី២០១១ ឌុបគ្នា៣នាក់ ក្នុងស្ថានភាពស្រវឹង និងក្នុងស្ថានភាពផ្លូវក្រាលគ្រួសក្រហមដីហុយមើលមិនឃើញផងនោះ បានទៅព្រលះ និងកង់គោយន្តកន្ត្រៃ ក្នុងទិសដៅបញ្ច្រាស់ទិសគ្នា បណ្តាលឲ្យរបួសធ្ងន់ទាំង៣នាក់ បញ្ជូនទៅសង្គ្រោះបន្ទាន់នៅមន្ទីរពេទ្យបង្អែកខេត្តពោធិ៍សាត់។ ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពីល្ងាច ថ្ងៃទី០៩ ខែធ្នូ ឆ្នាំ២០១៦ នៅចំណុចផ្លូវក្រាលគ្រួសក្រហមមួយខ្សែ ស្ថិតក្នុងភូមិខ្លាក្រពើ ឃុំអន្លង់ត្នោត ស្រុកក្រគរ ខេត្តពោធិ៍សាត់។
លោក ឯម រុន អធិការនគរបាលស្រុកក្រគរ បានប្រាប់ភ្នាក់ងារ Fresh News ឲ្យដឹងថា គ្រោះថ្នាក់ចរាចរណ៍ខាងលើនេះ បណ្តាលមកពីអ្នកបើកម៉ូតូឈ្មោះ នី មនូ ភេទប្រុស អាយុ២១ឆ្នាំ បើកបរស្ថិតក្នុងស្ថានភាពស្រវឹង និងក្នុងស្ថានភាពផ្លូវក្រាលគ្រួសក្រហម ដីហុយមើលមិនឃើញ បានជិះម៉ូតូឌុបគ្នាម៉ាកHonda Dream ព័ណ៌ខ្មៅ ស៊េរី២០១១ ពាក់ស្លាកលេខ ពោធិ៍សាត់ 1C-7620 រួមដំណើរដោយ ទី១- ឈ្មោះ ឡាំ លឿន ភេទប្រុស អាយុ ២០ឆ្នាំ និងទី២- ឈ្មោះ អៀង ចិន្តា ភេទប្រុស អាយុ ២២ អ្នកទាំង៣រស់នៅភូមិកំពង់លើ ឃុំក្បាលត្រាច ស្រុកក្រគរ ខេត្តពោធិ៍សាត់ បានបើកម៉ូតូពីត្បូងទៅជើង។លុះមកដល់ចំណុចកើតហេតុខាងលើបានទៅបុកព្រលះនិងកង់គោយន្តកន្ត្រៃ ពីមុខផ្នែកខាងឆ្វេង បណ្តាលឲ្យរបួសធ្ងន់ ភាគីម៉ូតូទាំង៣នាក់ បញ្ជូនទៅសង្គ្រោះបន្ទាន់នៅមន្ទីរពេទ្យបង្អែកពោធិ៍សាត់។
បច្ចុប្បន្នវត្ថុតាង គោយន្តកន្ត្រៃ និងម៉ូតូ ត្រូងបានយកមករក្សាទុក នៅអធិការដ្ឋាននគរបាលស្រុកក្រគរ រងចាំដោះស្រាយគ្នានៅពេលក្រោយ៕
