(ភ្នំពេញ)៖ អតីតសិស្សសាលាចតុមុខនឹងរៀបចំកម្មវិធីជួបជុំគ្នា នៅថ្ងៃទី១០ ខែធ្នូ ឆ្នាំ២០១៦ ចាប់ពីម៉ោង៣៖០០រសៀល ដល់ម៉ោង៨៖០០យប់ ក្នុងគោលបំណងដើម្បីរំលឹកគុណដល់លោកគ្រូអ្នកគ្រូ និងផ្តល់ឱកាសឱ្យអតីតសិស្សសាលាចតុមុខទាំងអស់បានរំលឹកឡើងវិញ នូវអនុស្សាវរីយ៍ពីអតីតកាល ដែលធ្លាប់សិក្សារៀនសូត្រ បន្ទប់ធ្លាប់រៀន បរិវេណសាលាដែលធ្លាប់រត់លេង កន្លែងដែលធ្លាប់ទិញនំចំណីជាមួយមិត្តភក្តិ ចង់ជួបមិត្តដែលធ្លាប់ប្រឡែងគ្នា និងជាពិសេសចង់ជួបលោកគ្រូអ្នកគ្រូ ដែលធ្លាប់បង្ហាត់បង្រៀន។
បើតាមក្រុមការងាររៀបចំកម្មវិធីបានឱ្យដឹងថា កម្មវីធីជួបជុំនេះមានការចូលរួមពី អតីតសិស្ស សិស្សានុសិស្ស និងភ្ញៀវកិត្តិយសជាច្រើន ដើម្បីស្វែងរកថវិកាជូនលោកគ្រូអ្នកគ្រូចំនួន២២៩នាក់ រួមទាំងលោកគ្រូអ្នកគ្រូដែលចូលនិវត្តន៍ ហើយដែលអ្នកចូលរួមទាំងអស់អាចទិញសំបុត្រ ដែលមានដាក់លក់នៅសាលាចតុមុខ ដោយទទួលបានមកវិញនូវអាហារប៊ូហ្វេ និងភេសជ្ជៈ។
ថវិកាដែលទទួលបានពីសប្បុរសជន ពីការលក់សំបុត្រ អាវយឺត និងកាបូប មួយចំណែកសម្រាប់ប្រគល់ជូនលោកគ្រូអ្នកគ្រូ និងមួយចំណែកទៀតបញ្ចូលក្នុងមូលនិធិរបស់សាលា ដើម្បីជួយទ្រទ្រង់ដល់លោកគ្រូអ្នកគ្រូដែលមានជំងឺ មានទុក្ខធុរៈផ្សេងៗ និងពេលចូលនិវត្តន៍។
សូមបញ្ជាក់ថាពិធីជួបជុំនេះ មិនកំណត់ចំពោះតែអតីតសិស្សសាលាចតុមុខទេ សប្បុរសជនផ្សេងៗទៀតក៏អាចចូលរួមបានដែរ។
ម្យ៉ាងទៀតប្រសិនបើចង់ទទួលបានព័ត៌មានបន្ថែម សូមទាក់ទងក្រុមការងាររៀបចំពិធីតាមទូរសព្ទ័លេខ៖ ០១២ ៥០០ ៥៣២ / ០៨១ ៥០០ ៥៣២៕
