(ភ្នំពេញ)៖ កីឡាករប៉េតង់ឆ្នើមរបស់កម្ពុជា លោក សុខ ចាន់មាន ដែលទើបដណ្ដើមបានមេដាយមាសពិភពលោក ក្នុងព្រឹត្តិការណ៍ World Championships 2016 នៅប្រទេស Madagascar កាលពីថ្ងៃទី៤ ខែធ្នូ កន្លងទៅ បានធ្វើដំណើរមកដល់មាតុភូមិវិញនាយប់ថ្ងៃពុធ ទី៧ ខែធ្នូនេះ ជាមួយនិងពិធីទទួលយ៉ាងអធិកអធម។

ដូចអ្វីដែលបានគ្រោងទុកម្ចាស់មេដាយមាសពិភពលោករូបនេះ​ ត្រូវបានទទួលដោយរថយន្ត ដែលមានចងទងជាតិខ្មែរ និងហែរអមដោយក្បួនម៉ូតូកិត្តិយសចំនួន ១២គ្រឿង និងអ្នកហែហមជាច្រើនផ្សេងទៀត ពីអាកាសយានដ្ឋានអន្ដរជាតិ មកកាន់គណៈកម្មាធិការជាតិអូឡាំពិកកម្ពុជា (NOCC) ដើម្បីជួបសំណេះសំណាលជាមួយលោក ថោង ខុន រដ្ឋមន្ដ្រីក្រសួងទេសចរណ៍ និងជាប្រធាន NOCC ផងដែរ។

គួរបញ្ជាក់ថា សុខ ចាន់មាន បានក្លាយជាម្ចាស់មេដាយមាសពិភពលោលលើវិញ្ញាសាវាយយកពិន្ទុ ដែលមានគូប្រជែងចំនួន ៤៧នាក់មកពីជុំវិញពិភពលោក។ នៅក្នុងការប្រកួត ចាន់មាន ធ្វើបានយ៉ាងល្អពីមួយវគ្គទៅមួយវគ្គ រហូតសន្សំបានពិន្ទុឡើងវគ្គផ្ដាច់ព្រ័ត្រ និងបានប្រកួតឈ្នះកីឡាករបារាំង Boursicaud Bruno ដោយលទ្ធផល ៣៦-២៩ ដើម្បីឈ្នះមេដាយមាសពិភពលោកតែម្ដង ខណៈមេដាយប្រាក់ បានទៅកីឡាករបារាំង និងមេដាយសំរឹទ្ធ បានទៅកីឡាករថៃ និងកីឡាករអ៉ីតាលី។

ជោគជ័យនេះដែរ ត្រូវបានសម្ដេចតេជោ ហ៊ុន សែន នាយករដ្ឋមន្ដ្រី នៃកម្ពុជា សម្ដែងការអបអរសាទរ និងកោតសរសើរជាខ្លាំង ចំពោះការខិតខំប្រឹងប្រែង របស់កីឡាករកម្ពុជា ពិសេសគឺកីឡាករ សុខ ចាន់មាន ដែលបង្កើតបានកំណត់ត្រាថ្មីមួយទៀត ក្នុងការដណ្ដើមយកមេដាយមាស កម្រិតពិភពលោក ជូនប្រទេសជាតិ។ លើសពីនេះ សម្ដេចតេជោ ក៏បានប្រកាសជួបសំណេះសំណាលដោយផ្ទាល់ជាមួយកីឡាករឆ្នើមរូបនេះ នាវេលាម៉ោង ៤ល្ងាចថ្ងៃទី៩ ខែធ្នូខាងមុខផងដែរ នៅវិមានសន្តិភាព ដើម្បីសំណេះសំណាលអបអរសាទរ និង លើកទឹកចិត្តផងដែរ៕