(ភ្នំពេញ)៖ អគ្គនាយកដ្ឋានបច្ចេកវិទ្យា គមនាគមន៍ និងព័ត៌មាន នៃក្រសួងប្រៃសណីយ៍​ និងទូរគមនាគមន៍ បានសហការជាមួយអង្គការ ICANN (Internet Corporation for Assigned Names and Numbers) បើកសិក្ខាសាលាបណ្ដុះបណ្ដាលមួយ មានរយៈពេល០៥ថ្ងៃ ស្តីពី DNS/DNSSEC (Domain Name System Security Extensions)។

សិក្ខាសាលនេះ រៀបចំឡើងចាប់ពីថ្ងៃទី០៥ ខែធ្នូ ឆ្នាំ២០១៦ ដែលប្រារព្ធពិធីបើកដោយ លោក ឈី សុខា អគ្គនាយករង នៃអគ្គនាយកដ្ឋានបច្ចេកវិទ្យា គមនាគមន៍និងព័ត៌មាន និងមានការអញ្ជើញចូលរួមពីសិក្ខាកាម មកពីបណ្ដាលក្រសួង-ស្ថាប័ន ក្រុមហ៊ុនឯកជន និង​ប្រតិបត្តិករ ទូគមនាគមន៍នានាសរុបចំនួន៥០រូប។

សូមជម្រាបថា DNS/DNSSEC ជាធនធានដ៏សំខាន់របស់អ៊ីនធឺណិត ដែលមិនអាច​ខ្វះ​បាន និងមានតួនាទីយ៉ាង​សំខាន់ ​ក្នុងការ​ផ្តល់​​ភាពងាយ​ស្រួល ​​សម្រាប់អ្នក​ប្រើប្រាស់​អ៊ីន​ធឺ​ណិត ដូចជាការប្រើប្រាស់ឈ្មោះគេហទំព័រ ដោយ​​មិនចាំបាច់ចងចាំ អាសយដ្ឋានជាលេខ (IP Address)។ សិក្ខាសាលានេះមានគោលបំណង បណ្តុះបណ្តាលជូនដល់​សិក្ខាកាម អំពីដំណើរការការតម្លើង ការកំណត់រចនាសម្ព័ន្ធ និងការពិសោធន៍សាកល្បងផ្ទាល់ ទៅលើការប្រើប្រាស់ DNS/DNSSEC។

បន្ទាប់ពីបញ្ចប់វគ្គបណ្តុះ​បណ្តាល​ខាងលើ សិក្ខា​កាម​​ទាំងអស់នឹងទទួលបាននូវចំណេះ​ដឹងថ្មីៗ ដែលជាប្រយោជន៍ដល់ការ​គ្រប់​គ្រង DNS/DNSSEC នៅតាមបណ្តា​ក្រសួង​-​ស្ថាប័ន ​ក្រុមហ៊ុន​ឯកជន និងប្រតិបត្តិករ​ទូរគមនា​គមន៍​​​​នានា​ប្រកប​ដោយ​ប្រសិទ្ធិភាពខ្ពស់ និងមានសន្តិសុខល្អប្រសើរ៕