(កំពង់ស្ពឺ)៖ ទោះមានការណែនាំពីមន្រ្តីយ៉ាងណា ក៏ម្ចាស់រថយន្តមួយចំនួន នៅតែគគ្លើនមិនព្រមអនុវត្តតាម ជាក់ស្ដែងនៅថ្ងៃទី០២ ខែធ្នូ ឆ្នាំ២០១៦នេះ ក្នុងពេលក្រុមការងារត្រូតពិនិត្យយានយន្តលើសទម្ងន់កំណត់ កំពុងចុះត្រួតពិនិត្យក្រុមរថយន្តទាំងនោះ ម្ចាស់រថយន្តបែរបញ្ចេញអាកប្បកិរិយាកោងកាច ដាក់កម្លាំងមន្រ្តីទៅវិញ ទាំងដែលរថយន្តរបស់ខ្លួនខុសច្បាប់ពេញទំហឹង។

ក្រុមការងារត្រូតពិនិត្យយានយន្តលើសទម្ងន់កំណត់នេះ ត្រូវបានដឹកនាំដោយលោក សេង ឈួន អនុរដ្ឋលេខាធិការក្រសួងសាធារណការ និងដឹកជញ្ជួន និងជាប្រធានលេខាធិការដ្ឋាន នៃគណៈកម្មាធិការដឹកនាំត្រួតពិនិត្យយានយន្ត ដឹកជញ្ជួនលើសកំណត់ ដោយបានសហការជាមួយអាជ្ញាធរដែនដី មន្ត្រីជំនាញ។

ក្នុងឱកាសនោះ កម្លាំងរបស់លោកបានឃាត់រថយន្តដែលផ្ទុកលើសទម្ងន់ចំនួន ៨គ្រឿង នៅភូមិសាស្ត្រ ឃុំសង្កែសាទប ស្រុកឱរ៉ាល់ ខណៈម្ចាស់រថយន្តខ្លះ បានបញ្ចេញអាកប្បកិរិយា ច្រង៉េងច្រង៉ាងដាក់ក្រុមការងារ តែក្រុមការងារនៅតែរៀបចំតាមនីតិវិធី ដោយតម្រូវឲ្យរថយន្តទាំងអស់ចូលថ្លឹង ដើម្បីពិនិត្យរកចំនួន ដែលលើសកំណត់ ប៉ុន្តែរថយន្តចំនួន ៦គ្រឿង បានប្រព្រឹត្តបទល្មើសនោះ បែរជាបានទម្លាក់អូសរបស់ខ្លួនតាមផ្លូវសាធារណៈ យ៉ាងអនាធិបតេយ្យ។

ទោះជាយ៉ាងណាក៏ដោយ ក្រុមការងារនៅតែបន្តអនុវត្តតាមនីតិវិធីដដែល ដោយមិនចុះចាញ់ទង្វើទាំងនោះឡើយ។ ដោយយោងទៅតាមការឆ្លងអនុសាសន៍ របស់លោក សេង ឈួន បានបង្ខំឲ្យម្ចាស់រថយន្តទាំងអស់ លើកអុសរបស់ខ្លួនដែលទម្លាក់ចេញនោះ ឡើងលើរថយន្តវិញ ហើយបើកយកទៅធ្វើការថ្លឹងទាំងអស់។

លោក សេង ឈួន បានឲ្យដឹងថា ករណីម្ចាស់រថយន្តមិនគោរពតាម ក្រុមការងារនឹងអនុវត្តតាមច្បាប់ដូចខាងក្រោម៖ ពិន័យជាប្រាក់, រើទំនិញ និងឃាត់យានយន្ត ទុករយៈពេល ១ឆ្នាំ និងដកហូតប័ណ្ណបើកបរព្យួររយៈពេល ២ឆ្នាំថែមទៀត។

លោក សេង ឈួន បានព្រមានថា «មន្រ្តីជំនាញនឹងអនុវត្តការងារនេះ នៅទូទាំងប្រទេស មិនថារថយន្តរបស់អ្នកតូច ឬអ្នកធំណានោះឡើយ ដូច្នេះសូមឲ្យមានការគោរពច្បាប់ទាំងអស់គ្នា»៕