(ភ្នំពេញ)៖ ព្រឹទ្ធសភា នៅព្រឹកថ្ងៃទី២ ខែធ្នូ ឆ្នាំ២០១៦នេះ បានបើកកិច្ចប្រជុំគណៈកម្មាធិការអចិន្ត្រៃយ៍ ក្រោមអធិបតីភាព សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៃកម្ពុជា។
កិច្ចប្រជុំនេះនឹងពិភាក្សាលើរបៀបវារៈ ដូចខាងក្រោម៖
១. ពិនិត្យ និងសម្រេចលើសំណើរបស់គណៈកម្មការទី២ ព្រឹទ្ធសភា សុំដាក់សេចក្តីព្រាងច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៧ ទៅក្នុងរបៀបវារៈសម័យប្រជុំលើកទី៩ ព្រឹទ្ធសភានីតិកាលទី៣។
២. ពិនិត្យ និងសម្រេចលើសំណើរបស់គណៈកម្មការទី៣ ព្រឹទ្ធភា សុំដាក់សេចក្តីព្រាងច្បាប់ ស្តីពីការអនុម័តយល់ព្រមលើកិច្ចព្រមពៀងទីក្រុងប៉ារីស ស្តីពីការប្រែប្រួលអាកាសធាតុ ទៅក្នុងរបៀបវរៈសម័យប្រជុំលើកទី៩ ព្រឹទ្ធសភានីតិកាលទី៣។
៣. កំណត់របៀបវារៈ និងកាលបរិចេ្ឆទបន្តសម័យប្រជុំលើកទី៩ ព្រឹទ្ធសភានីតិកាលទី៣។
បន្ទាប់ពីបានស្តាប់របាយការណ៍របស់គណៈកម្មការ ដែលជាវិស័យពាក់ព័ន្ធ និងស្តាប់មតិពិភាក្សារបស់អង្គប្រជុំរួចមក អង្គប្រជុំបានអនុម័តជាឯកច័ន្ឆ៖ កំណត់យកកាលបរិច្ឆេទបន្តសម័យប្រជុំលើកទី៩ ព្រឹទ្ធសភា នីតិកាលទី៣ នៅថ្ងៃទី៥ ខែធ្នូ ឆ្នាំ២០១៦ វេលាម៉ោង ០៨:០០នាទីព្រឹក ដោយមានរបៀបវារៈ៖
១. ពិនិត្យ និងផ្តល់យោបល់លើសេចក្តីព្រាងច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៧។
២. ពិនិត្យ និងផ្តល់យោបល់ លើសេចក្តីព្រាងច្បាប់ ស្តីពីការអនុម័តយល់ព្រមលើកិច្ចព្រមពៀងទីក្រុងប៉ារីស ស្តីពីការប្រែប្រួលអាកាសធាតុ ទៅក្នុងរបៀបវរៈសម័យប្រជុំលើកទី៩ ព្រឹទ្ធសភានីតិកាលទី៣៕
