(ស្វាយរៀង)៖ បេឡាជាតិរបបសន្តិសុខសង្គម (ប.ស.ស) នៃក្រសួងការងារ និងបណ្តុះបណ្តាលវិជ្ជាជីវៈ បានសហការជាមួយរោងចក្រ A & J (CAMBODIA) CO.,LTD មានទីតាំងស្ថិតនៅក្នុងតំបន់សេដ្ឋកិច្ចពិសេស តាយ សេង ក្រុងបាវិត ខេត្ដស្វាយរៀង បានរៀបចំពិធីចែកបណ្ណបើកបរ ជូនអ្នកបើកបររថយន្តដឹកកម្មករនិយោជិត នៅរោងចក្រនេះ។

ពិធីនេះត្រូវបានធ្វើឡើង ក្រោមអធិបតីភាព លោកឧត្តមសេនីយ៍ត្រី លុយ ឈីន អនុប្រធាននាយកដ្ឋានក្រសួងមហាផ្ទៃ លោក ជាវ ប៊ុនរិទ្ធ ប្រធានការិយាល័យ​គោលនយោបាយ និងជាអ្នកនាំពាក្យ ប.ស.ស ។ ការចុះផ្ដល់បណ្ណបើកបរនេះជាលើកទី ១៦ ហើយបណ្ណដែលត្រូវចែកជូនអ្នកបើកបរ មានចំនួន ២៩ បណ្ណ (ប្រភេទ «ខ» ចំនួន ០៤ បណ្ណ និងប្រភេទ «ឃ២» ចំនួន ២៥ បណ្ណ)។ ក្រុមការងារ ប.ស.ស បានសហការជាមួយអគ្គនាយកដ្ឋានដឹកជញ្ជូន នៃក្រសួងសាធារណការ និងដឹកជញ្ជូន បានចុះបណ្ដុះបណ្ដាល ប្រឡង ផ្ដល់បណ្ណបើកបរ សរុបបានចំនួន ១.៨៥៩ បណ្ណ (ប្រភេទ«ខ» ចំនួន ១.៤៥០ បណ្ណ និងប្រភេទ «ឃ២» ចំនួន ៤០៩ បណ្ណ)។

លោក ជាវ ប៊ុនរិទ្ធ បានក្រើនរំលឹកដល់អ្នកបើកបរទាំងអស់ត្រូវដឹងពីតួនាទី ភារកិច្ច កាតព្វកិច្ច និងការទទួលខុសត្រូវចំពោះមុខច្បាប់ នៅពេលដែលបើកបរបណ្ដាលឲ្យ​មានគ្រោះថ្នាក់ ជាយថាហេតុ ធ្វើឲ្យកម្មកររងរបួស ស្រាល ធ្ងន់ និងស្លាប់។

លោក ក៏បានស្នើសុំឲ្យអ្នកបើកបររថយន្ដដឹកកម្មករទាំងអស់គប្បីៈ យកជាប់តាមខ្លួននូវបណ្ណបើកបរត្រឹមត្រូវតាមប្រភេទយានយន្ដ, មានបណ្ណសម្គាល់រថយន្ដ និងពាក់ផ្លាកលេខត្រឹមត្រូវ, វិញ្ញាបនបត្រត្រួតពិនិត្យលក្ខណៈបច្ចេកទេស , លិខិតអនុញ្ញាតធ្វើអាជីវកម្មរថយន្ដ, មានគ្រឿងបរិធានគ្រប់គ្រាន់, បើកបរដោយមាន​ការប្រុងប្រយ័ត្នជានិច្ច, បើកបរទៅតាមល្បឿនដែលបានកំណត់, មិនត្រូវបើកបរក្រោមឥទ្ធិពលនៃគ្រឿងស្រវឹង ឬគ្រឿងញៀន, មិនត្រូវឈប់ ដែលធ្វើឲ្យមាន​ការកកស្ទះចរាចរណ៍ និង មិនត្រូវផ្ទុកលើសចំណុះ ដាក់លើដំបូល និងតោងរយីរយោងនោះទេ៕