(ភ្នំពេញ)៖ តាមការសន្យាលោក ហម បូរ៉ា រួមជាមួយតំណាងក្រុមហ៊ុនឆ្នោតនាគសំណាង បានទៅកាន់មន្ទីរពេទ្យ «គន្ធបុប្ផា» នាព្រឹកថ្ងៃទី៣០ ខែវិច្ឆិកា ឆ្នាំ២០១៦ ដើម្បីបរិច្ចាគលុយពីឈ្នះរង្វាន់ ឆ្នោតនាគសំណាង៥០ម៉ឺនដុល្លារ ជូនមន្ទីរនេះ ខណៈកំពុងត្រូវការជំនួយជារៀងរាល់ថ្ងៃ។ ពិធីទទួលប្រាក់ជំនួយ ចំនួន៥ពាន់ដុល្លារនេះ គឺមានការចូលរួម ដោយលោកវេជ្ជបណ្ឌិត Denis Laurent តំណាងមន្ទីរពេទ្យ «គន្ធបុប្ផា» ។
លោក ហម បូរ៉ា ដែលរស់នៅ ភូមិផ្សារត្រពាំងក្រឡឹង ឃុំគីរីវន្ត ស្រុកភ្នំស្រួច ខេត្តកំពង់ស្ពឺ នោះបានប្រាប់ថា រូបលោកជាអតិថិជនរបស់ឆ្នោត សំណាងនេះ ហើយលោកមានអារម្មណ៍រំភើបណាស់ និងស្ទើរតែមិនជឿទៀតផង ថាបានឈ្នះទឹកប្រាក់ Jackpot ៥០ម៉ឺនដុល្លា ពីក្រុមហ៊ុនឆ្នោតនាគ នាំសំណាង។ ក្រោយពីរូបលោកបានឈ្នះរង្វាន់ ថ្ងៃនេះលោកបានមកដល់ មន្ទីរពេទ្យគន្ធបុប្ផា ដោយតាមការសន្យា លោកធ្វើការបរិច្ចាគដល់មន្ទីរពេទ្យនេះ ចំនួនទឹកប្រាក់៥ពាន់ដុល្លារ ដើម្បីជួយសម្រាលទុក្ខលំបាក នៃការខ្វះខាតដែលត្រូវប្រាក់ជារៀងរាល់ថ្ងៃ ព្យាបាលក្មេងៗ។
លោក ហម បូរ៉ា បានបន្តថា ដោយសារតែលោកបានមើលឃើញ ពីទុក្ខលំបាករបស់ មន្ទីរពេទ្យ «គន្ធបុប្ផា» ក្នុងការស្វែងរកថវិកា ដើម្បីព្យាបាលកុមារក្រីក្ររាប់ពាន់នាក់ ក្នុង១ថ្ងៃ ទើបលោកមានចិត្តអាណិតអាសូរ និងបានបរិច្ចាគថវិកាខ្លះៗ ដើម្បីជួយដល់មន្ទីរពេទ្យដ៏ធំនេះ។ លោកក៏សូមអំពាវនាវ ដល់សប្បុរសជន ទាំងក្នុង និងក្រៅប្រទេស ដែលមានទឹកចិត្តសប្បុរធម៌ ចែករំលែកធនធាន ដើម្បីជួយដល់កុមារក្រីក្រ ជួយដល់មន្ទីរពេទ្យ «គន្ធបុប្ផា» ដែលកំពុងខ្វះខាត ក្នុងន័យឲ្យមន្ទីរពេទ្យនេះ បន្តជួយដល់កុមារកម្ពុជា បន្ថែមទៀត។
ក្រៅពីជួយដល់មន្ទីរពេទ្យ «គន្ធបុប្ផា» លោកបានផ្ដល់ថវិកាជូនដល់វត្តចំនួនពីរ នៅឯស្រុកកំណើតរបស់លោក ដោយក្នុងមួយវត្តទទួលបាន ថវិកា២ពាន់ដុល្លារ និងផ្ដល់ថវិកាមួយផ្នែកទៀត ជូនទៅសាលារៀនមួយ ចំនួន២ពាន់ដុល្លារ ទៀត ហើយលោក និងមានគម្រោងពង្រីកអាជីវកម្មរបស់គាត់ឲ្យកាន់តែធំ ផងដែរ។
លោក Ole Vagner អគ្គនាយកក្រុមហ៊ុនឆ្នោតនាគសំណាង មានប្រសាសន៍ថា យើងសូមប្រកាសជាផ្លួវការថា ពិតជាមានអ្នកឈ្នះរង្វាន់ Jackpot ៥០មឺនដុល្លារមែន ហើយសូមអបអរសារទ ដល់លោក ហម បូរ៉ា ដែលបានលេងឆ្នោតនេះ។ នេះជាការពិត ប្រសិនបើលោកមិនបានលេងនោះ លោកក៏មិនឈ្នះរង្វាន់ធំនេះដែរ។ ឆ្នោតនេះ ជាឆ្នោតល្អបំផុតសម្រាប់កម្ពុជា ដែលចំណាយក្នុងការផ្សងសំណាងអស់ត្រឹមតែ២ពាន់រៀល អាចនឹងឈ្នះបានលុយវិញ កន្លះលានដុល្លារអាមេរិក។
ក្នុងនាមលោកតំណាងឲ្យ ឆ្នោតនាគសំណាង បាននិយាយថា លោកពិតជាសប្បាយចិត្តយ៉ាងខ្លាំង និងរំភើបជាមួយរូបលោកដែលបានឈ្នះរង្វាន់ធំ ហើយយកប្រាក់ទាំងនេះ ទៅបរិច្ចាគក្នុងសង្គម ដើម្បីជួយដល់មន្ទីរពេទ្យ សាលារៀន និងវត្តអារាមជាដើម។ លោកសូមជូនពរ និងសង្ឃឹមថា ក្រុមគ្រួសាររបស់លោក ហម បូរ៉ា មានក្តីសុខ និងសំណាងល្អគ្រប់ពេលក្នុងឱកាសនេះ៕
