(ភ្នំពេញ)៖ បើទោះបីជាការចុះឈ្មោះបោះឆ្នោត ដើម្បីរៀបចំបញ្ជីឈ្មោះបោះឆ្នោតថ្មី នៅសល់តែ១ថ្ងៃទៀតយ៉ាងណាក្ដី ក៏អ្នកនាំពាក្យគណៈកម្មាធិការជាតិ រៀបចំការបោះឆ្នោត (គ.ជ.ប) លោក ហង្ស ពុទ្ធា បានអះអាងថា គិតមកដល់ថ្ងៃទី២៨ ខែវិច្ឆិកា ឆ្នាំ២០១៦នេះ គ.ជ.ប មិនទាន់មានគម្រោងណាមួយ ដើម្បីពន្យារពេលការចុះឈ្មោះបោះឆ្នោតនោះឡើយ។
បើទោះជាយ៉ាងនេះក្ដី លោក ហង្ស ពុទ្ធា បានបញ្ជាក់ទៀតថា នៅថ្ងៃទី២៩ ខែវិច្ឆិកា ឆ្នាំ២០១៦ស្អែកនេះ កិច្ចប្រជុំពិសេសមួយ នឹងត្រូវរៀបចំឡើងនៅ គ.ជ.ប ប៉ុន្ដែលោកមិនបានដឹងថា កិច្ចប្រជុំនោះ មានរបៀបវារៈស្តីពីការពន្យារពេល នៃការចុះឈ្មោះបោះឆ្នោតនោះឡើយ។
គិតត្រឹមថ្ងៃទី២៧ ខែវិច្ឆិកា ឆ្នាំ២០១៦ ប្រជាពលរដ្ឋខ្មែរជាង៧.៦លាននាក់ហើយ បានទៅចុះឈ្មោះបោះឆ្នោត ដែលស្មើជាង៧៩ភាគរយ។ ចំពោះលទ្ធផល នៃការចុះឈ្មោះបោះឆ្នោតនេះ ត្រូវបានលោក ហង្ស ពុទ្ធា លើកឡើងថា ជាលទ្ធផលមួយដែល គ.ជ.ប ពេញចិត្ត ហើយថាប្រទេសខ្លះមិនមានអ្នកចូលចុះឈ្មោះច្រើនដូចកម្ពុជាពេលនេះផង។
សូមជម្រាបថា ដំណើរការនៃការចុះឈ្មោះបោះឆ្នោត បានចាប់ផ្ដើមចាប់ពីថ្ងៃទី០១ ខែកញ្ញា ដល់ថ្ងៃទី២៩ ខែវិច្ឆិកា ឆ្នាំ២០១៦។ គ.ជ.ប បានបញ្ជាក់ថា ប្រជាពលរដ្ឋខែ្មរដែល មានសិទ្ធិបោះឆ្នោតមានជាង ៩.៦លាននាក់៕
