(ភ្នំពេញ)៖ នាយរងការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ លោក វរសេនីយ៍ទោ ប៉ែន ឃុន បានបញ្ជាក់ថា រហូតមកដល់រសៀលថ្ងៃទី២៧ ខែវិច្ឆិកា ឆ្នាំ២០១៦នេះ ក្រោយពីមន្រ្តីជំនាញ សហការជាមួយមន្ទីរសាធារណការ ដឹកនាំដោយលោកស្រី ផានី យើងរកឃើញរថយន្តចំនួន២គ្រឿង ដែលតទ្រុងខុសច្បាប់ ដែលតម្រូវឲ្យធ្វើកិច្ចសន្យា កាត់ទ្រុងដោយខ្លួនឯង។
លោក ប៉ែន ឃុន បានបន្តទៀតថា ក្នុងចំណោមរថយន្តទាំង១៨គ្រឿង ដែលនាយត្តមសេនីយ៍ស្នងការ បញ្ជាឲ្យចាប់នោះ គឺកម្លាំងប្រតិបត្តិការ បានអនុញ្ញាតឲ្យរថយន្តចំនួន៥គ្រឿង ត្រឡប់ទៅមុនដោយសារតែជារថយន្តដឹកផ្លែចេក និងត្រី ពោលវាជាបញ្ហាប្រឈមខ្លាចស្អុយ ហើយរថយន្តផ្សេងទៀត នៅបន្តពិនិត្យឯកសារថែមទៀត។
សូមបញ្ជាក់ថា នាយឧត្តមសេនីយ៍ ជួន សុវណ្ណ ស្នងការនគរបាលរាជធានីភ្នំពេញ បានបញ្ជាទៅកម្លាំងនគរបាលខណ្ឌឫស្សីកែវ ចាប់ឃាត់រថយន្ត ដែលដឹកសំពីងសំពោង រថយន្ត តទ្រុងខុសច្បាប់ និងគ្មានលិខិតចូលក្រុង ចំនួន១៨គ្រឿង ដើម្បីយកទៅធ្វើការផាកពិន័យតាមច្បាប់។
នាយរងការិយាល័យចរាចរផ្លូវគោក នៃស្នងការដ្ឋាននគរបាលរាជធានីភ្នំពេញ លោកវរសេនីយ៍ទោ ប៉ែន ឃុន បានបញ្ជាក់ថា ប្រតិបត្តិការចាប់ឃាត់រថយន្តល្មើសច្បាប់ទាំងនេះ បានធ្វើឡើង រយះពេល២ម៉ោង ពោលចាប់ពីវេលាម៉ោង ១០ រហូតដល់ម៉ោង ១២យប់រំលងអាធ្រាត្រចូលថ្ងៃទី២៧ ខែវិច្ឆិកា ឆ្នាំ២០១៦ ស្ថិតនៅតាមផ្លូវលេខ៥៩៨ ខណ្ឌឫស្សីកែវ។
លោក ប៉ែន ឃុន បានបន្តថា «ក្រោយមានបញ្ជារបស់នាយឧត្តមស្នងការ និងលោកវរសេនីយ៍ ចេវ ហាក់ នាយការិយាល័យចរាចរណ៍ផ្លូវគោក រួចមក កម្លាំងនគរបាលរបស់យើង បានចុះទៅចាប់រថយន្តទាំងនេះ ចំនួន១៨គ្រឿង ដែលរថយន្តខ្លះ ដឹកឥវ៉ាន់សំពីងសំពោង រថយន្តខ្លះត ទ្រុងខុសច្បាប់ ហើយរថយន្តខ្លះទៀត គ្មានលិខិតអនុញ្ញាតចូលមកក្រុងនោះឡើយ»។
ជាមួយគ្នានេះ នាយរងការិយាល័យរូបនេះ បានអំពាវនាវដល់ម្ចាស់ក្រុមហ៊ុន និងអាជីវកម្មទាំងឡាយ ត្រូវចូលរួមគោរពច្បាប់ទាំងអស់គ្នា ពោលរថយន្តដឹកទំនិញរបស់ខ្លួន ត្រូវមានលក្ខណ:បច្ចេកទេសត្រឹមត្រូវ ដោយមិនត្រូវបើកបរល្មើសច្បាប់នោះឡើយ ដើម្បីចូលរួមកាត់បន្ថយគ្រោះថ្នាក់ចរាចរណ៍នៅក្នុងសង្គមជាតិទាំងមូល។
នៅព្រឹកថ្ងៃទី២៧ ខែវិច្ឆិកា ឆ្នាំ០១៦នេះ លោក ចេវ ហាក់ និងលោក ប៉ែន ឃុន ព្រមទាំងមានការចូលរួមពីមន្រ្តីមន្ទីរសាធារណការ បានធ្វើការអប់រំ ដល់អ្នកបើករថយន្តដឹកផ្លែចេក ដែលទំនិញងាយរងគ្រោះ ដើម្បីឲ្យពួកគេយល់ពីច្បាប់ចរាចរណ៍ ហើយអនុញ្ញាតឲ្យត្រឡប់ទៅវិញ៕
