(កំពង់ស្ពឺ)៖ លោកយាយជរាព្រះជន្ម ១១៦ឆ្នាំ និងមានកូន២នាក់ ម្នាក់អាយុ៧០ឆ្នាំ និងម្នាក់ទៀតអាយុ៧២ឆ្នាំ ព្រមទាំងចាស់ៗជរាគ្មានទីពឹងចំនួន២៣គ្រួសារទៀត រស់នៅឃុំព្រៃក្មេង ស្រុកភ្នំស្រួច ខេត្តកំពង់ស្ពឺ មានក្តីរំភើបស្ទើរស្រក់ទឹកភ្នែក នៅពេលបានការសណ្តោសប្រណីពី សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលបានចាត់ឱ្យ លោកស្រី ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា រួមនឹងសហការី នៃសាខាកាកបាទ ក្រហមកម្ពុជា ខេត្តកំពង់ស្ពឺ ចុះជួបសួរសុខទុក្ខ ព្រមទាំងបាននាំយកអំណោយមនុស្សធម៌ជូនពួកគាត់ដល់លំនៅឋានផ្ទាល់ នៅថ្ងៃទី២៦ ខែវិច្ឆិកា ឆ្នាំ២០១៦នេះ។
លោកយាយ លោកតា ទាំងអស់ បានសំដែងនូវការដឹងគុណ និងថ្លែងអំណរគុណយ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដោយគ្មានថ្ងៃបំភ្លេចបានឡើយ ព្រោះអំណោយដ៏ថ្លែថ្លានេះនឹងជួយសម្រាលការលំបាកដល់ជីវភាពរស់នៅរបស់ពួកគាត់បានមួយរយៈពេល ហើយពួកគាត់បានថ្លែងទៀតថា «សម្តេចកិត្តិព្រឹទ្ធបណ្ឌិត គឺជាមាតាមនុស្សធម៌ដ៏ឆ្នើមបំផុតមិនអាចខ្វះបាន ដែលសម្ដេច តែងតែបានយកចិត្តទុកដាក់ និងគិតគូរពីសុខទុក្ខប្រជាពលរដ្ឋដោយមិនលំអៀង មិនប្រកាន់វណ្ណៈ ពូជសាសន៍ ពណ៌សម្បុរ ឬនិន្នាការនយោបាយអ្វីឡើយ»។
ក្នុងដំណើរចុះសួរសុខទុក្ខដល់លំនៅឋាននេះ លោកស្រី អគ្គលេខាធិការរងទី១ បានពាំនាំនូវក្តីនឹករលឹក និងការគិតគូរខ្ពស់ពីសំណាក់ សម្តេចកិត្តិព្រឹទ្ធបណ្ឌិត ជូនចំពោះលោកយាយ លោកតា ថ្វីបើនៅពេលនេះសម្តេចមិនបានអញ្ជើញចុះមកផ្ទាល់ ក៏លោក បានចាត់ឱ្យក្រុមការងារចុះមកជួបផ្ទាល់ជាមួយចាស់ៗ ដែលរស់នៅម្នាក់ឯង ឬគ្មានអ្នកថែទាំបានដិតដល់។
សូមបញ្ជាក់ថា អំណោយត្រូវប្រគល់ជូនគ្រួសារលោកយាយ ប៉ែន រី ដែលមានព្រះជន្ម ១១៦ឆ្នាំនោះ រួមមាន៖ អង្ករ ១១០គីឡូក្រាម មី ២កេស ទឹកប្រទាល កន្ទុយក្រពើ ២កេសធំ ទឹកត្រី ១២ដប ទឹកស៊ីអ៊ីវ ១២ដប នំផ្អែម ១ថង់ធំ មុង២ ភួយ២ សារុង២ ក្រមា២ និងថវិកា ៥០០,០០០រៀល។
ដោយឡែក សម្រាប់លោកយាយ លោកតា២៣គ្រួសារទៀត ក្នុងមួយគ្រួសារៗ ទទួលបាន ៖ អង្ករ ៣០គីឡូក្រាម មី ១កេស ត្រីខ ១០កំប៉ុង ទឹកត្រី ៦ដប ទឹកស៊ីអ៊ីវ ៦ដប មុង១ ភួយ១ សារុង១ ក្រមា១ និងថវិកា ១០០,០០០រៀល៕
