(ប៉ៃលិន)៖ រដ្ឋបាលខេត្តប៉ៃលិន នៅព្រឹកថ្ងៃទី២៤ ខែវិច្ឆិកា ឆ្នាំ២០១៦នេះ បានប្រារព្ធទិវាជាតិលើកកម្ពស់អនាម័យជនបទ លើកទី៧ ក្រោមប្រធានបទ «រួមគ្នាលើកកម្ពស់អនាម័យជនបទ» ដែលធ្វើនៅ អនុវិទ្យាល័យសន្តិភាព ស្ថិតក្នុងភូមិដូង ឃុំស្ទឹងកាច់ ស្រុកសាលាក្រៅ។
ពិធីនេះ ត្រូវបានធ្វើឡើងក្រោមវត្តមាន លោកស្រី ជា លាភ អភិបាលរងខេត្តប៉ៃលិន, លោក ពេជ្រ សំបូរ ប្រធានមន្ទីរអភិវឌ្ឍន៍ជនបទខេត្ត, លោកស្រីអភិបាលរង ស្រុកសាលាក្រៅ, លោកស្នងការរងខេត្ត, លោកមេបញ្ជាការរងកងរាជអាវុធហត្ថខេត្ត, តំណាងប្រធានមន្ទីរជុំវិញខេត្ត, អង្គការដៃគូរអភិវឌ្ឍន៍, លោកគ្រូ អ្នកគ្រូ សិស្សានុសិស្ស និងប្រជាពលរដ្ឋជាង៣០០នាក់។
លោកស្រី មាស សំនៀង អភិបាលរងស្រុកសាលាក្រៅ បានលើកឡើងថា នេះជាលើកទី៧ ក្នុងទិវាជាតិលើកកម្ពស់អនាម័យជនបទ ១៣វិច្ឆិកា ដើម្បីផ្សព្វផ្សាយ និងជំរុញការប្រតិបត្តិអនាម័យល្អ តាមរយៈការប្រកាន់យកទម្លាប់ល្អ៣ប្រការគឺ លាងសម្អាតដៃ ជាមួយសាប៊ូ ការប្រើប្រាស់បង្គន់ និងបរិភោគទឹកមានសុវត្ថិភាព នៅគ្រប់រាជធានី-ខេត្ត។
លោក ពេជ្រ សំបូរ ប្រធានមន្ទីរអភិវឌ្ឍន៍ជនបទខេត្ត បានថ្លែងថា ផលប៉ះពាល់យ៉ាងធ្ងន់ធ្ងរដល់សុខភាព ក្រុមការងារសេដ្ឋកិច្ចសង្គម មន្ទីរអភិវឌ្ឍន៍ជនបទខេត្ត បានបន្តខិតខំស្វែងរកកិច្ចសហការ និងការគាំទ្រពីគ្រប់ផ្នែកពាក់ព័ន្ធទាំងអស់រួមមាន ក្រសួងអភិវឌ្ឍន៍ជនបទ រដ្ឋបាលខេត្ត អង្គការដៃគូរអភិវឌ្ឍន៍ ផ្នែកឯកជននានា ព្រមទាំងអាជ្ញាធរមូលដ្ឋាន ដើម្បីធ្វើការបំផុសជំរុញ ដល់ប្រជាពលរដ្ឋតាមសហគមន៍ឲ្យយកចិត្តទុកដាក់ ប្រតិបត្តិអនាម័យល្អ ដើម្បីសុខមាលភាព សុភមង្គលក្នុងគ្រួសារ។
លោកប្រធានមន្ទីរ បានបន្តថា ដោយមានការគ្រាំទ្រពីអង្គការយូនីសេហ្វ មន្ទីរបានអនុវត្តកម្មវិធីសហគមន៍ ដឹកនាំអនុវត្តអនាម័យ ហៅកាត់ថា (CLTS) បានអនុវត្តភូមិចំនួន៣៥ និងឃុំ៣ ក្នុងស្រុកសាលាក្រៅ ខេត្តប៉ៃលិន ហើយការកង្វះអនាម័យ និងយល់ដឹងពីសារប្រយោជន៍ បានផ្លាស់ប្តូរឥរិយា ធ្វើការសាងសង ប្រើប្រាស់បង្គន់អនាម័យ ក្នុងក៏មានការកើនឡើងនូវបង្គន់ថ្មីៗចំនួន ១,៨០៧ផងដែរ។
លោកស្រី ជា លាភ អភិបាលរងខេត្ត បានអានសារលិខិតរបស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលបានថ្លែងក្នុងឱកាសទិវាជាតិលើកកម្ពស់អនាម័យជនបទ ព្រមទាំងបានមានមតិសំណេះសំណាល ដោយផ្តល់នូវអនុសាសន៍ល្អៗ ដល់អង្គពិធីទាំងមូល និងជំរុញការគ្រាំទ្រ និងការលើកទឹកចិត្ត ដល់ប្រជាពលរដ្ឋសិស្សានុសិស្សគ្រប់ៗរូប ឲ្យចូលរួមប្រត្តិបត្តិអនាម័យស្អាត ដើម្បីសុខភាពទាំងអស់គ្នា។
នាឱកាសនោះ មន្ត្រីរាជការ ប្រជាពលរដ្ឋ និងសិស្សានុសិស្ស ក៏មានការលើកជាសំណួរ-ចម្លើយ ដោយមានផ្តល់ជារង្វាន់លើកទឹកចិត្ត ដែលបានស្ម័គ្រចិត្តចូលរួមឆ្លើយសំណូរផងដែរ៕
