(ព្រះសីហនុ)៖ ក្នុងគោលបំណងបង្កើនស្តង់ដារ និងជំនាញ ដល់អ្នកបម្រើការងារក្នុងសេវាកម្មម៉ាស្សាជូនភ្ញៀវទេសចរ នាថ្មីៗនេះ ក្រុមមន្រ្តីទេសចរណ៍ បានបើកវគ្គបណ្តុះបណ្តាលមួយ នៅខេត្តព្រះសីហនុ ដើម្បីផ្តល់ជំនាញ៣ជូនពួកគេ។ ជំនាញទាំងនោះរួមមាន ម៉ាស្សា ស្ប៉ា និងបដិសេដ្ឋកិច្ច។
លោក តាំង សុចិត្តគ្រឹស្នា ប្រធានមន្ទីរខេត្តព្រះសីហនុ បានឱ្យដឹងថា វគ្គបណ្តុះបណ្តាល ស្តីពី «អ្នកជំនាញម៉ាស្សា ស្ប៉ា និងបដិសណ្ឋារកិច្ចទេសចរណ៍» លើកទី៣នេះ ជាការចូលរួមលើកកម្ពស់គុណភាពសេវាកម្មទេសចរណ៍ សណ្តាប់ធ្នាប់ និងផ្តល់ភាពពេញចិត្តដល់ភ្ញៀវទេសចរ ដែលមកកម្សាន្ត នៅខេត្តព្រះសីហនុ ជាពិសេស ក្នុងព្រឹត្តការណ៍បុណ្យសមុទ្រ នាថ្ងៃទី ២៣ ដល់ ២៥ ខែធ្នូ ឆ្នាំ២០១៦ ខាងមុខនេះ ឱ្យបានកាន់តែប្រសើ និងលើកម្ពស់តម្លៃស្ត្រី ក្នុងវិសយ័ទេសចរណ៍ ក៏ដូចជាសេវាកម្មម៉ាស្សា និងស្ប៉ា។
វគ្គបណ្តុះបណ្តាលនេះ មានការសហការរៀបចំដោយ មន្ទីរទេសចរណ៍ខេត្តព្រះសីហនុ ជាមួយ មន្ទីរសុខាភិបាល និងសណ្ឋាគារខ្សាច់ស ក្រោមអធិបតេយ្យភាព លោក នី ផល្លី អគ្គលេខាធិការរងគណៈកម្មាធិការអភិវឌ្ឍន៍ និងគ្រប់គ្រងតំបន់ឆ្នេរកម្ពុជា លោក តាំង សុចិត្តគ្រឹស្នា ប្រធានមន្ទីរខេត្តព្រះសីហនុ និងលោកស្រី មិន សុគន្ធា អនុប្រធានមន្ទីរសុខាភិបាលខេត្តព្រះសីហនុ។
វគ្គបណ្តុះបណ្តាលនេះ មានសិក្ខាកាមចូលរួមសរុប ៨២នាក់ ស្រី៧៨នាក់ ដែលមកពីរមនីយដ្ឋានផ្សេងៗ នៅតំបន់ឆ្នេរខេត្តព្រះសីហនុ៕
