(ពោធិ៍សាត់)៖ លោកស្រី ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា តំណាងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានបន្តសកម្មភាព សំណេះ សំណាល ចុះសួរសុខទុក្ខ និងផ្តល់អំណោយមនុស្សធម៌ ជូន ចាស់គ្មានទីពឹង គ្រួសារទីទ័លក្រ គ្រួសារជនពិការ និងអ្នកផ្ទុកមេរោគអេដស៍ ចំនួន ១,៤៧៩គ្រួសារ ផ្សេងទៀត នៅខេត្តពោធិ៍សាត់ នៅថ្ងៃទី២៣ ខែវិច្ឆិកា ឆ្នាំ២០១៦។ ការចែកអំណោយនេះ បានធ្វើឡើងនៅទីតាំងចំនួន ២កន្លែង គឺ នៅវត្តហ្លួងចំនួន ៨៦៨គ្រួសារ អញ្ជើញមកពីសង្កាត់ចំនួន ៧ នៃក្រុងពោធ៍សាត់ និងនៅវត្តពោធិ៍ ចំនួន ៦១១គ្រួសារ មកពីឃុំចំនួន ៩ នៃស្រុកកណ្តៀង។
ក្នុងឱកាសនោះ លោកស្រី ម៉ែន នារីសោភ័គ អគ្គលេខាធិការរងទី ១ កាកបាទក្រហមកម្ពុជា បានលើកឡើង ពីការយកចិត្តទុកដាក់ និងគិតគូជានិច្ចចំពោះសុខទុក្ខប្រជាពលរដ្ឋពីសំណាក់ថ្នាក់ដឹកនាំ កាកបាទ ក្រហមកម្ពុជា ដែលមានសម្តេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ គង់ប្រថាប់ជាព្រះប្រធានកិត្តិយស និងមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន។
ទន្ទឹមនឹងនោះ លោកស្រី ម៉ែន នារីសោភ័គ បានពាំនាំប្រសាសន៍ផ្ដាំផ្ញើពី សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនប្រជាពលរដ្ឋទាំងអស់ សូមយកចិត្តទុកដាក់ថែរក្សាសុខភាព ដោយមានអនាម័យល្អក្នុងការរស់នៅ ពិសាទឹកដាំឆ្អិន សម្អាតបរិស្ថានជុំវិញផ្ទះ និងលុបបំបាត់ជម្រកសត្វមូស ដែលជាប្រភពចម្លងជំងឺផ្សេងៗ។ ចំពោះអ្នកផ្ទុកមេរោគអេដស៍ សូមទៅពិនិត្យសុខភាព និងលេបថ្នាំពន្យាជីវិតទៅតាមកាលកំណត់របស់គ្រូពេទ្យជា ពិសេស ចំពោះស្ត្រីមានផ្ទៃពោះ សូមទៅពិនិត្យផ្ទៃពោះឱ្យបានទៀងទាត់ ដើម្បីបង្ការការឆ្លងមេរោគពីម្តាយទៅកូន និងទៅសម្រាលកូននៅមណ្ឌលសុខភាព។
លោកស្រី ម៉ែន នារីសោភ័គ បានស្នើសុំឲ្យប្រជាពលរដ្ឋមានស្មារតីប្រុងប្រយ័ត្នខ្ពស់ពីការធ្វើដំណើរតាមដងផ្លូវ ដោយរួមគ្នាគោរពច្បាប់ចរាចរណ៍ផ្លូវគោក ពាក់មួកសុវត្ថិភាពឱ្យបានត្រឹមត្រូវ កុំបើកបរហួសល្បឿនកំណត់ ឬជែងគ្នា និងបើកបរក្រោមឥទ្ធិពលនៃគ្រឿងស្រវឹង។ ជាងនេះទៅទៀត សូមចូលរួមជៀសឱ្យឆ្ងាយពីគ្រឿងញៀន និងគ្រឿងស្រវឹង ដែលជាហេតុនាំឱ្យមានអំពើហិង្សា និងមហន្តរាយផ្សេងៗដល់ក្រុមគ្រួសារ និង សង្គមជាតិ។បន្ថែមពីនេះ សូមប្រជាពលរដ្ឋ ត្រៀមបង្ការ ពីការកើនឡើងកម្តៅខ្លាំង ក្នុងរដូវប្រាំងខាងមុខនេះ ដោយត្រូវរក្សាប្រភពទឹកប្រើប្រាស់ឱ្យបានគ្រប់គ្រាន់។
គួរបញ្ជាក់ថា គ្រួសារនីមួយៗទទួលបាន អង្ករ ៣០គីឡូក្រាម មី ១កេស ត្រីខ ១០កំប៉ុង សារុង១ មុង១ ភួយ១ ក្រមា១ ទឹកសុទ្ធ១ដប នំបុ័ង ១ដើម ព្រមទាំងប្រគេនព្រះសង្ឃគង់ នៅវត្តទាំងពីរខាងលើ បច្ច័យ និងគ្រឿងឧបភោគ បរិភោគមួយចំនួនផងដែរ៕
