(ភ្នំពេញ)៖ និស្សិតកម្ពុជាមួយក្រុម នឹងចេញដំណើរទៅកាន់ប្រទេសសឹង្ហបុរី នៅដើមខែមករា ឆ្នាំ២០១៧ខាងមុខ ដើម្បីដណ្តើមយកជ័យលាភីលេខមួយ ផែ្នកផ្សារភាគហ៊ុន។
យោងតាមសេចក្តីប្រកាសព័ត៌មាន របស់សាកលវិទ្យាល័យអាមេរិកាំងភ្នំពេញ (AUPP) នៅថៃ្ងទី២៣ ខែវិច្ឆិកា ឆ្នាំ២០១៦នេះ បានឲ្យដឹងថា និស្សិតឆ្នើមកម្ពុជាចំនួន ៣នាក់ មកពីសាកលវិទ្យាល័យ AUPP ជាតំណាងប្រទេស កម្ពុជាដើម្បីចូលរួមប្រកួតវគ្គផ្តាច់ព្រ័ត្រ នៃកម្មវិធីប្រកួតជួញដូរភាគហ៊ុនCIMB ប្រចាំតំបន់អាស៊ាន ឆ្នាំ២០១៦ នៅប្រទេសសិង្ហបុរី នាថ្ងៃទី ៩ ខែមករា ឆ្នាំ២០១៧ ជាមួយនឹងក្រុមជើងឯក មកពី៤ ប្រទេសផ្សេងទៀត ក្នុងតំបន់អាស៊ាន។
ធនាគារស៊ីអាយអឹមប៊ី (CIMB Bank) បានសហការជាមួយក្រុមហ៊ុនផ្សារមូលបត្រកម្ពុជា (CSX) ក្នុងការរៀបចំកម្មវិធីប្រកួតជួញដូរភាគហ៊ុនCIMB ប្រចាំតំបន់អាស៊ាន ឆ្នាំ២០១៦ សម្រាប់និស្សិតកម្ពុជា ក៏ដូចជានិស្សិតក្នុងតំបន់មកពី៥ប្រទេស ក្នុងនោះរួមមាន ប្រទេសសឹង្ហបុរី ម៉ាឡេស៊ី ថៃ ឥណ្ឌូនេស៊ី និងកម្ពុជា។
បន្ទាប់ពីការប្រកួតដ៏ស្វិតស្វាញ ក្នុងចំណោមនិស្សិត១១៦ក្រុម មកពី១៧គ្រឹះស្ថានឧត្តមសិក្សានៅកម្ពុជា និស្សិត AUPP ត្រូវបានប្រកាស ជាក្រុមជើងឯកថ្នាក់ជាតិ ដែលត្រូវបានជ្រើសរើសជាតំណាងកម្ពុជា ដើម្បីទៅចូលរួមប្រកួតវគ្គផ្តាច់ព្រ័ត្រ នៃកម្មវិធីខាងលើ។
គណៈគ្រប់គ្រង សាស្រ្តាចារ្យ បុគ្គលិក និង និស្សិត សាកលវិទ្យាល័យ AUPP សូមចូលរួមអបអរសាទរ និងសូមកោតសរសើរដល់ និស្សិតទី១៖ឈ្មោះ ល័ក្ខ សុផាវត្តី ទី២៖ឈ្មោះ ហ៊ុយ រ័ត្នពិសាល និងទី៣៖ឈ្មោះ ជិន ច័ន្ទដាលុច្ស ដែលបានខិតខំដណ្តើមយកជ័យជំនះដ៏ធំធេងនេះ សម្រាប់ខ្លួនឯង ក្រុមគ្រួសារ មិត្តភ័ក្រ្ត សាស្រ្តាចារ្យ និងបុគ្គលិក នៅសាកលវិទ្យាល័យ AUPP។
លោក ហុង សុហួរ អគ្គនាយក នៃក្រុមហ៊ុនផ្សារមូលបត្រកម្ពុជា បានថ្លែង ក្នុងពិធីប្រគល់ពានរង្វាន់ដល់ ជ័យលាភីកំពូលថា «ការប្រកួតផ្សារមូលបត្រថ្នាក់តំបន់ អាស៊ាន របស់ធនាគារ CIMB ពិតជាផ្តល់នូវសារប្រយោជន៍ជា ច្រើនដល់និស្សិតកម្ពុជា នូវបទពិសោធន៍ក្នុងទីផ្សារភាគហ៊ុន ដើម្បីបង្កើត នូវគំនិតសហគ្រិនវ័យក្មេង វិនិយោគិន ក៏ដូចជា អភិវឌ្ឍវិស័យធនធានមនុស្សនៅកម្ពុជា»។
សូមបញ្ជាក់ថា AUPP បានចុះកិច្ចព្រមព្រៀងជាមួយសាកលវិទ្យាល័យធំៗចំនួនពីរ នៅសហរដ្ឋអាមេរិក សម្រាប់ការផ្តល់ កម្មវិធីសិក្សាសញ្ញាបត្រពីរ (Dual Degrees)។ សញ្ញាបត្រមួយចេញដោយ AUPP និងមួយទៀតចេញ ដោយសាកលវិទ្យាល័យអារីហ្សូណា (University of Arizona) ឬសាកលវិទ្យាល័យរដ្ឋហ្វតហេយ (Fort Hays State University) បន្ទាប់ពីបញ្ចប់ការសិក្សាដោយជោគជ័យនៅ AUPP។
សម្រាប់ព័ត៌មានលម្អិត សូមទំនាក់ទំនងមកកាន់ទូរសព្ទលេខ ០២៣ ៩៩០ ០២៣/ ០១២ ២៦៦ ៦៣១ ឬចូលទៅកាន់ គេហទំព័រ www.aupp.edu.kh៕
