(ភ្នំពេញ)៖ បន្ទាប់ពីជំនុំជម្រះអស់រយៈពេល១ព្រឹក តុលាការកំពូល បានសម្រេចប្រកាសសាលដីកា លើសំណុំរឿងសុំមោឃភាពនីតិវិធីតុលាការ ចំពោះមន្រ្តីអាដហុក ៤រូប និងគ.ជ.ប ១រូប នៅថ្ងៃទី៣០ ខែវិច្ឆិកា ឆ្នាំ២០១៦ ខាងមុខនេះ។
មន្ត្រីពន្ធនាគារ បានបញ្ជូនមន្ត្រីអាដហុក៤រូប និងអគ្គលេខាធិការរង គ.ជ.បមួយរូប មកតុលាការកំពូល នៅព្រឹកថ្ងៃទី២៣ ខែវិច្ឆិកានេះ ដើម្បីបើកសវនាការជំនុំជម្រះ។ ឯកសារតុលាការកំពូល បង្ហាញថា សវនាការនេះដឹកនាំដោយ លោកស្រី គិម សត្ថាវី ជាប្រធានក្រុមប្រឹក្សាជំនុំជម្រះ និង លោក ឈួន ចាន់ថា ជាតំណាងមហាអយ្យការ។ កម្មវត្ថុនៃសវនាការនេះគឺបណ្តឹងសុំមោឃភាព នីតិវិធីរបស់សាលាដំបូងរាជធានីភ្នំពេញ។
សូមជំរាបថា មន្ត្រីអាដហុក៤រូប និងមន្ត្រីគជប ជាប់ចោទពីបទសូកប៉ាន់សាក្សី និងសមគំនិតក្នុងអំពើសូកប៉ាន់សាក្សីដល់ អ្នកនាង ខុម ចាន់តារ៉ាទី ហៅស្រីមុំ ដើម្បីកុំឲ្យអ្នកនាងនិយាយការពិតប្រាប់សមត្ថកិច្ចចំពោះរឿងអាស្រូវផ្លូវភេទរបស់ លោក កឹម សុខា។ ក្រុមជនត្រូវចោទទាំង៥នាក់ត្រូវបាន លោក ធាម ច័ន្ទពិសិដ្ឋ ចៅក្រមស៊ើបសួរសាលាដំបូងរាជធានីភ្នំពេញ សម្រេចកាលពីល្ងាចថ្ងៃទី០២ ខែឧសភា ឆ្នាំ២០១៦ ឃុំខ្លួនដាក់ពន្ធនាគារ ដើម្បីរង់ចាំការស៊ើបអង្កេតបន្តទៀត៕
