(ឧត្តរមានជ័យ)៖ ឧកញ៉ា លី យ៉ុងផាត់ បានឧបត្ថម្ភថវិកា១០០លានរៀន និងឧកញ៉ា លីម ហេង ឧបត្ថម្ភ២៤លានរៀន សម្រាប់ឧបត្ថម្ភដល់អតីតយុទ្ធកម្ពុជាក្នុងខេត្តឧត្តរមានជ័យ តាមរយៈលោកឧត្តមសេនីយ៍ទោ ម៉ែន លី ស្នងការនគរបាលខេត្ត និងជាប្រធានគណៈកម្មាធិការសមាគម អតីតយុទ្ធកម្ពុជាខេត្ត នៅព្រឹកថ្ងៃទី២៣ ខែវិច្ឆិកា ឆ្នាំ២០១៦នេះ។ ថវិកានេះ ត្រូវបានពីលោក កុក ទៀង និងលោក នាង វិរៈរតនា យកមកប្រគល់ជូន។
លោកឧត្តមសេនីយ៍ទោ ម៉ែន លី តំណាងនាយឧត្តមសេនីយ៍ គន់ គីន អគ្គលេខាធិការ នៃគណៈអចិន្ត្រៃគណកម្មាធិការកណ្តាល សមាគមន៍អតីតយុទ្ធជនកម្ពុជា បានថ្លែងថា អតីតយុទ្ធជន ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានសមាគមអតីតយុទ្ធជនកម្ពុជា ដែលសមាគមមានគោលដៅ ពង្រឹងពង្រីកគ្រឹះការពារជាតិ តាមរយៈការអនុវត្តគោលនយោបាយជាតិមួយដ៏ត្រឹមត្រូវ លើកស្ទួយជីវភាពរស់នៅ ប្រកបដោយក្តីមេត្តាករុណា ចំពោះបុព្វការីជន ប្រជាជន អតីតយុទ្ធជន យុទ្ធនារី នៃកងកម្លាំងប្រដាប់អាវុធជាតិ។
លោកប្រធានគណៈកម្មាធិការសមាគម អតីតយុទ្ធកម្ពុជាខេត្ត បានបញ្ជាក់ថា កន្លងមកយុទ្ធជនបានធ្វើពលីកម្មយ៉ាងធំធេង បូជាអាយុជីវិត សាច់ស្រស់ ឈាមស្រស់ ដើម្បីបុព្វហេតុជាតិ និងប្រជាជន នៅគ្រប់ដំណាក់កាល នៃប្រវត្តិសាស្ត្រ ជាពិសេសក្នុងដំណាលតស៊ូរំដោះជាតិ ឲ្យរួចផុតពីរបបប្រល័យពូជសាសន៍ ប៉ុល ពត និងដំណាក់កាលអនុវត្តនយោបាយឈ្នះ ឈ្នះ របស់ប្រមុខរាជរដ្ឋាភិបាល ជាពិសេសជួយធ្វើឲ្យជីវភាព អតីតយុទ្ធជន មានជីវភាពល្អប្រសើរឡើង។
លោក បានថ្លែងនូវការកោតសរសើ ចំពោះបណ្តាមន្ទីរអង្គភាពនានា ដែលបានជួយគាំទ្រថវិកា សម្រាប់តម្កល់ទុកនៅក្នុងសមាគម សម្រាប់ជួយដោះស្រាយ ជូនអតីតយុទ្ធជន។ ជាចុងក្រោយ លោក និងក្រុមការងារទាំងអស់ បានថ្លែងអំណរអគុណចំពោះលោកឧកញ៉ា លី យ៉ុង និងលោកឧកញ៉ា លីម ហេង ដែលបានឧបត្ថម្ភថវិកានេះ៕
