(ភ្នំពេញ​)៖ មន្ត្រី​តុលាការ​បញ្ជាក់​ថា​ នៅ​ព្រឹក​ថ្ងៃ​ទី​២៥​ ខែ​វិច្ឆិកា​ ខាងមុខ​នេះ​ សាលា​ដំបូង​រាជធានី​ភ្នំពេញ​ នឹង​បើក​សវនាការ​សំណុំ​រឿង​លោក ​សម​ រង្ស៊ី​ ប្រធាន​គណបក្ស​សង្គ្រោះ​ជាតិ​ និង​ជំនួយ​ការ​ពីរ​នាក់​ ករណី​សម​គំនិត​ក្លែង​សន្ធិសញ្ញា​ផែនទី​ព្រំដែន​កម្ពុជា​វៀតណាម​ បង្ក​ភាព​វឹកវរ​ធ្ងន់​ធ្ងរ​ដល់​សន្តិសុខ​សង្គម​ ។​

តាម​ឯកសារ​តុលាការ​បង្ហាញ​ថា​ សវនាការនេះ​ដឹកនាំ​ដោយ​លោក​ លាង​ សំណាត់​ ជា​ប្រធាន​ក្រុម​ប្រឹក្សា​ជំនុំជម្រះ​ លោក​ អ៊ឹម​ វណ្ណៈ​ លោក​ នូ​ វាសនា​ ជា​សមាជិក​ និង​ លោក​ សៀង​ សុខ​ ជា​តំណាង​អយ្យការ​ ។​

ឯកសារ​ដដែល​ បង្ហាញ​ទៀត​ថា​ លោក​ សម​ រង្ស៊ី​ លោក​ អ៊ឹង​ ជុងលាង​ ហៅ​ ម៉ាប់​ ហៅ​ កូន​ជ្រូក​ និង​ ឈ្មោះ​ សត្យា​ សម្បត្តិ​ ឬ​ សម្បត្តិ​ សត្យា​ ត្រួវ​បាន​តុលាការ​ចោទប្រកាន់​ពី​បទ​ «សមគំនិត​ក្នុង​អំពើ​ក្លែង​បន្លំ​ឯកសារ​សាធារណៈ​ បទ​ប្រើប្រាស់​ឯកសារ​សាធារណៈ​ក្លែង​ និង​ បទ​ ញុះញង់​បង្ក​ឲ្យ​មាន​ភាព​វឹកវរ​ធ្ងន់​ធ្ងរ​ដល់​សន្តិសុខ​សង្គម​ តាម​មាត្រា​៦២៩​ មាត្រា​៦៣០​ និង​មាត្រា​៤៩៥​ នៃ​ក្រម​ព្រហ្មទណ្ឌ​»

សំណុំ​រឿង​នេះ​ គឺ​ត្រូវ​បាន​បំបែក​ចេញ​ពី​សំណុំ​រឿង​លោក​ ហុង​ សុខហួរ​ សមាជិក​ព្រឹទ្ធសភា​គណបក្ស​ សម​ រង្ស៊ី​ ហើយ​លោក​ ហុង​ សុខហួរ​ ត្រូវ​បាន​សាលា​ដំបូង​រាជធានី​ភ្នំពេញ​ កាលពី​រសៀល​ថ្ងៃ​ទី​៧​ ខែ​វិច្ឆិកា​ ផ្តន្ទា​ទោស​ដាក់​ពន្ធនាគារ​រយៈពេល​៧ឆ្នាំ​ រួច​ហើយ​ ក្នុង​សំណុំ​រឿង​ក្លែង​សន្ធិសញ្ញា​ផែនទី​ព្រំដែន​កម្ពុជា​វៀតណាម​នេះ​៕