(កំពង់ធំ)៖ លោក អ៊ុត សំអន អភិបាលខេត្តកំពង់ធំ នៅថ្ងៃទី១៨ ខែវិច្ឆិកា ឆ្នាំ២០១៦ បានដឹកនាំអាជ្ញាធរស្រុកសន្ទុក និងប្រធានអង្គភាពជំនាញពាក់ព័ន្ធចុះពិនិត្យដី ក្នុងតំបន់រម្យនីយដ្ឋានភ្នំសន្ទុក ភ្នំស្រះខ្ចៅ និងភ្នំពែនជុំ ដើម្បីរៀបចំការថែរក្សា និងការពារធនធានធម្មជាតិ បរិស្ថានដើម្បីទប់ស្កាត់ការរុករានពីប្រជាពលរដ្ឋ។
ក្រោយធ្វើដំណើរត្រួតពិនិត្យនៅតំបន់ភ្នំចំនួនបីគឺ ភ្នំសន្ទុក ភ្នំស្រះខ្ចៅ និងភ្នំពែនជុំដែលស្ថិតនៅក្នុងឃុំចុំនួនបួនគឺ ឃុំកកោះ ឃុំទីពោធិ ឃុំត្បូងក្រពើ និងឃុំជ្រាប់ រួចមក លោកអភិបាលខេត្តបានថ្លែងថា តំបន់នេះចែកចេញជាបី គឺ តំបន់ស្នូលតំបន់ទ្រនាប់ និងតំបន់រណប។ តំបន់ទាំងនេះមានលក្ខណៈដាច់ដោយឡែកពីគ្នា គឺការអាស្រ័យផលរបស់ប្រជាពលរដ្ឋក៏មានលក្ខណៈខុសគ្នា ដែលធ្វើឲ្យយើងមានការចាប់អារម្មណ៍ និងអភិរក្ស។
លោកបានបន្តថា ទោះបីជាមានការរុករានពីប្រជាពលរដ្ឋក៏ដោយ ក៏តំបន់នេះមិនទាន់ហួសពេលនៅឡើយទេ ដោយសារព្រៃធម្មជាតិរក្សានូវភាពដើមច្រើន ការដាំដើមឈើនៅតាមចង្កេះភ្នំរបស់ប្រជាពលរដ្ឋមិនទាន់មានការរុករានដល់លើភ្នំ នៅតំបន់ស្នូលមានដើមឈើដុះល្អៗមានថ្មដែលមានលក្ខណៈធម្មជាតិ សំណង់ អាស្រមនៅមិនទាន់មានលក្ខណៈរឹងមាំនៅឡើយ។ លោកបន្ថែមទៀតថា យើងនឹងរួមសហការគ្នា ដើម្បីរិះរកវិធីសាស្រ្តដែលមានភាពល្អប្រសើរសម្រាប់គ្រប់គ្រងរម្យនីយដ្ឋានប្រវត្តិសាស្រ្តទាំងនេះ ហើយការគ្រប់គ្រងក៏មិនមែននូវតែរក្សាភាពដើមទាំងអស់ដែរ គឺយើងនឹងឈានទៅរកការប្រែប្រួលដី ដែលប្រជាពលរដ្ឋរុករានកន្លងមកនោះឲ្យមានប្រយោជន៍ឡើងវិញ អ្វីដែលមានលក្ខណៈដើមត្រូវឲ្យមានប្រសិទិ្ធភាពកុំឲមានការប៉ះពាល់តទៅទៀត ប្រជាពលរដ្ឋដែលប្រើប្រាស់ដីហើយត្រូវធ្វើបច្ចុប្បន្នភាពដើម្បីអប់រំអំពីការប្រើប្រាស់និងស្វែងយល់ពីផលប្រយោជន៍របស់ពួកគាត់។
លោកបានសង្កត់ធ្ងន់ថា ការអភិរក្សនេះគឺដើម្បី ឲ្យមានភាពគង់វង្សនៃកេរ្តិ៍ដំណែលប្រវត្តិសាស្រ្ត និងធម្មជាតិរបស់តួភ្នំមិនឲ្យមានការសឹករិចរិល រក្សាទុកនូវធនធាននេះទៅថ្ងៃអនាគតដើម្បីមានភាពទាក់ទាញភ្ញៀវទេសចរណ៍ពោលដើម្បីអភិវឌ្ឍន៍នឹងឈានដល់ការវិនិយោគក្លាយជាគោលដៅទេសចរណ៍ធម្មជាតិ គួបផ្សំនិងការកែច្នៃ សហគមន៍ដែលនៅជុំវិញឲ្យពួកគាត់ទទួលបានផលតាមរយៈការដាំដុះ និងការលក់វត្ថុធាតុដើមដែលមានក្នុងមូលដ្ឋាន ហើយលក្ខណៈសំខាន់គឺឲ្យប្រជាពលរដ្ឋយល់ដឹងពីការថែរក្សានូវរម្យនីយដ្ឋានទាំងអស់នេះ៕
