(ភ្នំពេញ)៖ លោក ងន សំាង នាយកប្រតិបត្ដិក្រុមហ៊ុន  RMA Cambodia បានថ្លែងថា «ក្រុមហ៊ុន RMA Cambodia និង Ford Cambodia មានទស្សនវិស័យមួយ ដែលក្រុមហ៊ុនយើងមិនត្រឹមតែផ្ដោត ទៅលើអាជីវកម្មតែប៉ុណ្ណោះទេ តែយើងក៏បានដើរតួនាទីយ៉ាងសំខាន់ ក្នុងការរួមចំណែកអភិវឌ្ឍសង្គមជាតិ តាមរយៈសកម្មភាពផ្សេងៗជាច្រើន ដែលយើងធ្លាប់តែបានធ្វើកន្លងមក រួមទាំងវិស័យកីឡាផងដែរ»។

លោកបានលើកឡើងបែបនេះ ក្នុងសនិ្នសីទកាសែត ស្ដីពីព្រឹត្ដិការណ៍ ប្រកួតកីឡាទោចក្រយាន «ជិះកង់ ដើម្បីទាំងអស់គ្នា ឆ្នាំ២០១៦» ​ដែលប្រព្រឹត្ដទៅនៅអគារ តាំងបង្ហាញ រថយន្ដ Ford  ដែលមានទីតាំងនៅតាមបណ្ដាយផ្លូវ ព្រះមុនីវង្ស ដែលចូលរួមដោយដោយលោក នុត សាអាន ប្រធានសហព័ន្ធខ្មែរ កីឡាករទោចក្រយាន, លោក ញឹម ខេមរា អនុប្រធានសហព័ន្ធខ្មែរ កីឡាទោចក្រយាន លោក អ៊ុង សិទ្ធជាតិ អគ្គនាយក នៃអគ្គនាយកដ្ឋានកីឡា នៃក្រសួងអប់រំយុវជន និងកីឡា និងលោក ប៉េក គីមស្រ៊ាង អគ្គនាយក្រុមហ៊ុន G Pas De`cor and advertising Co.,Ltd នៅថ្ងៃទី១៧ ខែវិច្ឆិកា ឆ្នាំ២០១៦។

លោកបន្ដថា ជាក់ស្ដែងក្នុងព្រឹត្ដិការណ៍ ប្រកួតកីឡាទោចក្រយាន «ជិះកង់ដើម្បីអ្នកទាំងអស់គ្នា ឆ្នាំ២០១៦» នេះ ក្រុមហ៊ុនយើង បានឧបត្ដម្ភ នូវអាវ មួក និងរថយន្ដ Ford សម្រាប់ដឹកកីឡករ-ការីនី ផងដែរ។

លោកបន្ដថា «ក្រុមហ៊ុន RMA Cambodia និង Ford Cambodia បានសហការជាមួយសហព័ន្ធកីឡាទោចក្រយាន រៀបចំនូវកម្មវិធីនេះឡើង ក្នុងគោលបំណងពង្រីកនូវសមត្ថភាពកីឡាករ-ការីនី រក្សាកម្លាំងកំជាណត់ និងល្បឿនឋេរ តាមរយៈការជិះប្រណាំងផ្លូវឆ្ងាយ ឲ្យទទួលបានអារម្មណ៍ជាធម្មតា ដើម្បីផ្ដល់នូវបទពិសោធន៍ល្អៗ ក្នុងការត្រៀមខ្លួនប្រកួតខ្នាតអន្ដរជាតិ»។

លោក ញឹម ខេមរា បានថ្លែងផងដែរថា សហព័ន្ធកីឡាទោចក្រយាន បានសម្រេចដាក់ចេញនូវវិញ្ញាសារពីរក្នុងការជិះកង់ រួមមានវិញ្ញាសារកង់ប្រណាំងផ្លូវរាប ដែលមានការចូលរួមពី អត្ដពលិកផ្នែកជើងឯក (ចម្ងាយផ្លូវប្រណាំង១១០គីឡូម៉ែត្រ) ក្រុមថ្នាល ក្រុមវ័យចំណាស់ និងក្រុមនារី (ចម្ងាយផ្លូវប្រណាំង៥២គីឡូម៉ែត្រ)និងវិញ្ញាសារកង់ប្រណាំងផ្លូវភ្នំ ដែលមានការចូលរួម ពីកីឡាករ-ការីនីទាំងពីរភេទ (ចម្ងាយផ្លូវប្រណាំងចំនួន ៥០គីឡូម៉ែត្រ) នៅថ្ងៃទី២០ ខែវិច្ឆិកា ខាងមុខនេះ កាត់ផ្លូវជាតិ​ លេខ៦A  ហើយការប្រលងប្រណាំងនេះ មានការចូលរួមដោយកីឡាករ-ការីនីចំនួនប្រមាណ ៣០០នាក់ ក្នុងនោះ នារី៣០នាក់ និងបុរស ២៧០នាក់។

គួរបញ្ជាក់ថា ព្រឹត្ដិការណ៍ប្រកួតកីឡាទោចក្រយាន មានការឧបត្ដម្ភធំ ពីក្រុមហ៊ុនRMA Cambodia និងFord Cambodia និងសហការឧបត្ថម្ភដោយក្រុមហ៊ុន G Pas De`cor and Advertising Co.,Ltd និងក្រុមហ៊ុនPizza Company ហើយក៏មានការចូលរួមចំណែករៀបចំដោយ ក្រសួងអប់រំ យុវជន និងកីឡា និសសហព័ន្ធខ្មែរកីឡាទោចក្រយានផងដែរ៕