(ភ្នំពេញ)៖ ក្រុមក្មេងស្ទាវទំនើង៣នាក់ ជិះម៉ូតូធំ៣គ្រឿងបង្ហោះប្រណាំងគ្នា លាន់រំពងយ៉ាងអនាធិប្បតេយ្យផ្អើលអស់ប្រជាពលរដ្ឋ តែជាលទ្ធផល ត្រូវកម្លាំងកងរាជអាវុធហត្ថខណ្ឌជ្រោយចង្វារក្របួចជាប់ដើម្បីបន្តសាកសួរភ្លាមៗ ។
ករណីបង្ក្រាបក្រុមបង្ហោះម៉ូតូយ៉ាងអនាធិប្បតេយ្យនេះ បានធ្វើឡើងនៅយប់ថ្ងៃទី១៧ ខែវិច្ឆិការ ឆ្នាំ២០១៦ នៅចំណុចក្បែរសួនច្បារព្រះនាងប្រាជ្ញបារមី តាមបណ្ដោយផ្លូវទន្លេសាប ស្ថិតក្នុងភូមិ១ សង្កាត់ជ្រោយចង្វារ ខណ្ឌជ្រោយចង្វារ បន្ទាប់ពីកម្លាំងល្បាតរបស់កងរាជអាវុធហត្ថខណ្ឌជ្រោយចង្វារ ទទួលបានសេចក្ដីរាយការណ៍ពីបងប្អូនប្រជាពលរដ្ឋថា មានករណីក្រុមក្មេងទំនើងបង្ហោះប្រឡងប្រណាំងម៉ូតូលាន់រំពងយ៉ាងអនាធិប្បតេយ្យ គ្មានសណ្ដាប់ធ្នាប់ ផ្អើលអស់ប្រជាពលរដ្ឋរស់នៅតាមបណ្ដោយផ្លូវទន្លេសាប និងស្របពេលដែលកម្លាំ ងអាវុធហត្ថកំពុងប្រតិបត្តិការយាមល្បាតដើម្បីរក្សាការពារសន្តិសុខ សុវត្ថិភាពនិងទប់ស្កាត់បង្ក្រាបនូវរាល់បទល្មើស ផ្សេងៗដែលកើតមានឡើងក្នុងមូលដ្ឋានផងនោះ ទើបឈាន ទៅដល់ការបង្ក្រាបនិងឃាត់ខ្លួនបក្ខពួកទាំងនោះបានចំនួន៣នាក់រួមទាំងម៉ូតូធំ៣គ្រឿងដើម្បីបញ្ជូនមកសួរនាំនៅទីបញ្ជាការកងរាជអាវុធហត្ថខណ្ឌជ្រោយចង្វារតែម្ដង ។
មន្ត្រីអាវុធហត្ថខណ្ឌជ្រោយចង្វារបានបញ្ជាក់ថា ក្រុមក្មេងទំនើងដែលត្រូវឃាត់ខ្លួនទី១- ឈ្មោះ មាស សុនាថ ភេទប្រុស អាយុ២២ឆ្នាំ ទី២- ឈ្មោះវឿន សុភក្តី ភេទប្រុស អាយុ២២ ឆ្នាំ ទី៣- ឈ្មោះស៊ុយ ស្រស់ ភេទប្រុស អាយុ២០ឆ្នាំ ។
មន្ត្រីអាវុធហត្ថដដែលបានបញ្ជាក់ទៀតថា ក្រោយឃាត់ខ្លួនសួរនាំនិងស្រាវជ្រាវប៉ុន្មានម៉ោងក្រោយរកឃើញថា ក្រុមក្មេង ទំនើងទាំងនេះមិនមានពាក់ព័ន្ធបទល្មើស ដែលគួរឲ្យកត់សម្គាល់ក៍សម្រេចអប់រំណែនាំឲ្យអាណាព្យាបាលមកធានាដោយធ្វើកិច្ចសន្យាឲ្យត្រឡប់ទៅផ្ទះវិញរៀងៗខ្លួនផងដែរ ៕
