(ភ្នំពេញ)៖ ស្ត្រីម្នាក់ហេតុតែញៀនល្បែងនិងខឹងប្ដីមិនឲ្យលុយទៅស្រង់ដើមខណៈចាញ់ល្បែង ក៏សម្រេចចិត្តទៅលោត ទឹកលើស្ពានជ្រោយចង្វារថ្មីដើម្បីសម្លាប់ខ្លួន តែមិនបានស ម្រេចឡើយត្រូវកម្លាំងអាវុធហត្ថខណ្ឌជ្រោយចង្វារ ដែលឈរជើងយាមល្បាតនៅនោះក្បែរជួយសង្គ្រោះទាន់ពេលវេលា ។
ករណីស្ត្រីញៀនល្បែងសម្រេចចិត្តលោតទឹកលើដ្ពានជ្រោយចង្វារនេះ បង្កឲ្យមានការភ្ញាក់ផ្អើលនៅល្ងាចថ្ងៃទី១៧ ខែវិច្ឆិការ ឆ្នាំ២០១៦ នៅចំណុចលើស្ពានជ្រោយចង្វារថ្មី ត្រើយខាងកើត ស្ថិតក្នុងភូមិដើមគរ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ។
ស្ត្រីរងគ្រោះបានរៀបរាប់ប្រាប់សមត្ថកិច្ចថា គាត់មានឈ្មោះ ហេង រី អាយុ៣៥ឆ្នាំ មុខរបរនៅផ្ទះ និងមានប្តីមុនឈ្មោះភុំ អុន អាយុ៥៨ឆ្នាំ មុខរបរជាមន្ត្រីពន្ធដាចូលនិវត្តន៍ ស្នាក់នៅ ឃុំលើកដែក ស្រុកកំពូនភ្នំ ខេត្តកណ្ដាល និងមានកូនប្រុសម្នាក់ ព្រមទាំងមិនដែលត្រូវគ្នារយៈពេលជិតមួយឆ្នាំមកហើយ។ រីឯប្តីក្រោយឈ្មោះ សៀត សុគន្ធ អាយុ៣៤ឆ្នាំ មុខរបរម៉ៅការសំណង់ និងបានចាប់ដៃគ្នាត្រឹមរយៈពេលទើបបាន៥ខែប៉ុណ្ណោះ ដែលស្នាក់នៅភូមិស្វាយតាណាក់ ឃុំស្វាយរមៀត ស្រុកសាច់កណ្តាល ខេត្តកណ្តាល ដោយពុំទាន់មានកូនចៅជាមួយគ្នាឡើយទេ ។
ស្ត្រីរងគ្រោះបានរៀបរាប់ប្រាប់សមត្ថកិច្ចទាំងទឹកភ្នែកទៀតថា រូបគាត់ចូលចិត្តលេងល្បែងណាស់ ហើយគាត់មានប្តីមុននិងគ្រួសារក្រោយ «ពោលគឺមានប្ដីចំនួន២នាក់» ព្រោះមុនពេលកើតហេតុ ស្ត្រីរងគ្រោះបានយកលុយរបស់ប្ដីក្រោយជិត៣០០ដុល្លា ដើម្បីទៅលេងល្បែង ស្រាប់តែត្រូវចាញ់អស់ទើបសម្រេចទាក់ទងណាត់ទៅជួបបុរសជាប្តីមុន ឲ្យមកជួបក្នុងបំណងលួងលោមរកលុយដើម្បីទៅស្រង់ដើម តែជាអកុសលការលួងលោមមិនសម្រេច ក៍សម្តេចចិត្តមកលោតទឹកស្ពានជ្រោយចង្វារដើម្បីសម្លាប់ខ្លួន តែត្រូវប្តីមុន តាមមកទាន់ជួយសង្គ្រោះបាន។ លុះមួយសន្ទុះធំក្រោយមកស្ត្រីរងគ្រោះបានសម្រេចមកលោតទឹកស្ពានជ្រោយចង្វារម្ដងទៀត ក៍ត្រូវកម្លាំងអាវុធហត្ថខណ្ឌជ្រោយចង្វារ ដែលឈរជើងយាមល្បាតនៅក្បែរនោះមកឃាត់ជួយសង្គ្រោះទាន់ពេលវេលា និងប្រគល់ឲ្យកម្លាំងនគរបាលប៉ុស្ដិ៍ជ្រោយចង្វារ ដើម្បីបន្តសាកសួរស្រាវជ្រាវរហូតរកឃើញក្រុមគ្រួសារឲ្យមកទទួលត្រឡប់ទៅផ្ទះវិញផងដែរ ៕
