(ស្វាយរៀង)៖ សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា នៅថ្ងៃទី១៨ ខែវិច្ឆិកា ឆ្នាំ២០១៦ បានអញ្ជើញចុះសំណេះសំណាលជាមួយក្រុមប្រឹក្សាឃុំ សង្កាត់ ក្រុង ស្រុក មន្រ្តីរាជការ កងកម្លាំងប្រដាប់អាវុធ ខេត្តស្វាយរៀង និងការត្រួតពិនិត្យសមិទ្ធផល នៅក្នុងខេត្តស្វាយរៀង។

ក្រោយពីការចុះពិនិត្យមើលស្ថានការណ៍នេះ សម្តេចតេជោ ហ៊ុន សែន បានចាត់ចែង និងសម្រេចផ្តល់អគារសិក្សា អគារទីចាត់ការសរុប៦ខ្នង ស្មើ ៩៨បន្ទប់ ដើម្បីបម្រើដល់ការសិក្សារបស់កូនចៅប្រជាពលរដ្ឋ លោកគ្រូ អ្នកគ្រូនៅខេត្តស្វាយរៀង ក្នុងនោះសម្តេចតេជោ ហ៊ុន សែន បានជួយកសាងអគារសិក្សាថ្មី ជូនដល់វិទ្យាល័យ អនុវិទ្យាល័យ និងបឋមសិក្សាស្វាយរៀង ចំនួន៥ខ្នង កំពស់២ជាន់ ៣ជាន់ សរុប៨៨បន្ទប់ និងបានជួយកសាងផ្ទះគ្រូបង្រៀន១ខ្នង កំពស់២ជាន់១០បន្ទប់។

ក្រោយពីសម្តេចតេជោ ហ៊ុន សែន មានប្រសាសន៍បែបនេះសិស្សានុសិស្ស នៃវិទ្យាល័យ អនុវិទ្យាល័យ បឋមសិក្សា និងគរុកោសល្យ ក្នុងខេត្តស្វាយរៀង បានបង្ហាញនូស្នាមញញឹម ភាពរួសរីករាក់ទាក់ស្និតស្នាល ជាមួយសម្តេចតេជោនាយករដ្ឋមន្រ្តីផងដែរ។

គិតរហូតមកដល់ពេលនេះ ដំណើរចុះសំណេះសំណាល ជាមួយក្រុមប្រឹក្សាឃុំ សង្កាត់ ក្រុង ស្រុក មន្រ្តីរាជការ កងកម្លាំងប្រដាប់អាវុធ និងប្រជាពលរដ្ឋ ពីសំណាក់ សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា នៅសល់តែ២ខេត្តទៀតប៉ុណ្ណោះ ពោលគឺនៅខេត្តព្រៃវែង និងខេត្តកោះកុង ក្នុងចំណោមខេត្ត-រាជធានី ទាំង២៥ ទូទាំងប្រទេស៕