(ភ្នំពេញ)៖ នៅព្រឹកថ្ងៃទី១៨ ខែវិច្ឆិកា ឆ្នាំ២០១៦នេះ​ ក្រុមអតីតអ្នកបើករថយន្តកាពីតូលចំនួន៤៥នាក់ បានលើកគ្នាដង្ហែរក្បូនតវ៉ាម្ដងទៀត ដោយតម្រង់ ទៅខុទ្ធការិយាល័យ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ដើម្បីដាក់លិខិតស្នើសុំអន្តរាគមន៍ពីសម្ដេចតេជោ ​ឱ្យជំរុញដល់ក្រុមហ៊ុនកាពីតូល ទទួលយកពួកគាត់ចូលធ្វើការវិញ ក្រោយពីបញ្ឈប់អស់រយៈពេលជាង១ឆ្នាំមកនេះ។

លោក អ៊ាន គឹមហ៊ុន អគ្គនាយកសហព័ន្ធសហជីពកម្មករវិស័យដឹកជញ្ជូនកម្ពុជា ដែលចូលរួមតវ៉ាជាមួយអតីតអ្នកបើករថយន្តក្រុងកាពីតូល បានឲ្យដឹងថា «ក្រុមរបស់យើងបានដាក់លិខិត​ស្នើជូនរដ្ឋមន្រ្តីក្រសួងការងារ និងបណ្ដុះ​បណ្ដាលវិជ្ជាជីវៈ លោក អ៉ិត សំហេង ហើយលោករដ្ឋមន្រ្តីបានចេញលិខិតមួយ ប្រកាសឲ្យក្រុមហ៊ុនកាពីតូល​ទទួលយកយើងទាំងអស់​គ្នាចូលធ្វើការវិញ ប៉ុន្តែភាគីក្រុមហ៊ុនមិនបានទទួលយកបុគ្គលិកឲ្យចូលធ្វើការវិញ តាមបញ្ជារបស់ លោករដ្ឋមន្រ្តីក្រសួងការងារនោះទេ»។

លោកបានបន្តថា ដោយសារក្រុមហ៊ុនកាពីតូល នៅតែមិនព្រមទទួលក្រុមរបស់លោក ឲ្យចូលធ្វើការវិញនេះហើយ ទើបក្រុមរបស់គាត់ បាននាំគ្នា ដាក់ពាក្យបណ្ដឹងទៅដល់សហគមន៍អន្តរជាតិ ដើម្បីជួយ​អន្តរាគមន៍បន្ថែមទៀត ហើយលោក អ៉ិត សំហេង រដ្ឋមន្រ្តីក្រសួងការងារ ក៏ធ្លាប់បានកោះប្រជុំ ជាមួយភាគីខាងសហជីពរបស់លោក និងភាគីក្រុមហ៊ុនកាពីតូល ដើម្បីធ្វើការសម្របសម្រួលគ្នា ប៉ុន្តែភាគីក្រុមហ៊ុន នៅតែប្រកាន់ជំហរ មិនព្រមទទួលយកក្រុមសហជីពរបស់លោក ឲ្យចូលធ្វើការដដែល រហូតមកដល់បុច្ចុប្បន្ននេះ។

បើតាមការឱ្យដឹងពីអតីតអ្នកបើករថយន្តទាំងនេះ បានឱ្យដឹងថា ក្រុមហ៊ុនកាពីតូល បានបញ្ឈប់ ថ្នាក់ដឹកនាំ សហជីពចំនួន៥នាក់ ដោយលើកមូលហេតុថា កាត់បន្ថយចំនួនបុគ្គលិកបន្ទាប់​ពីក្រុមកម្មករ​និយោជិត ក្នុងក្រុមហ៊ុនកាពីតូល បាននាំគ្នាបង្កើតក្រុមសហជីពមួយ។ ទោះជាយ៉ាងណា Fresh News នៅមិនទាន់ទាក់ទងតំណាងក្រុមហ៊ុនកាពីតូលបាននៅឡើយទេនៅព្រឹកថ្ងៃទី១៨ ខែវិច្ឆិកា ឆ្នាំ២០១៦នេះ៕