(ពោធិ៍សាត់)៖ រថយន្តហ្វូសូ១គ្រឿង ព្រលះគ្នាជាមួយរថយន្តហ៊ីយ៉ុនដាយ ១គ្រឿងទៀត ក្នុងទិសដៅបញ្ច្រាស់ទិសគ្នា ភ្លាមនោះ ក៏មានរថយន្តហ្វូសូ១គ្រឿង ផ្សេងទៀត បើកពីក្រោយជ្រុលទៅបុករថយន្តហ៊ីយ៉ុនដាយ បណ្តាលឲ្យព្រូរថយន្តម្នាក់ កៀបជាប់កាប៊ីនរងរបួសធ្ងន់ ផ្អើលអស់អ្នកភូមិ និងកម្លាំងសមត្ថកិច្ច លើកំណាត់ផ្លូវជាតិលេខ៥ ស្ថិតក្នុងភូមិសាលាគំរូ សង្កាត់ព្រៃញី ក្រុងពោធិ៍សាត់។
ក្រោយពីទាញចេញពីកាប៊ីនរថយន្តបានហើយ កម្លាំងសមត្ថកិច្ចបានបញ្ជូនជនរងគ្រោះទៅសង្គ្រោះបន្ទាន់ នៅមន្ទីរពេទ្យបង្អែកពោធិ៍សាត់ ដែលហេតុការណ៍ដ៏ព្រឺព្រួចនេះ បានកើតឡើងនៅព្រឹកថ្ងៃទី១៨ ខែវិច្ឆិកា ឆ្នាំ២០១៦។
លោក ឈន រិទ្ធ អធិការនគរបាលក្រុងពោធិ៍សាត់ បានប្រាប់ភ្នាក់ងារ Fresh News ឲ្យដឹងថា ហេតុការណ៍គ្រោះថ្នាក់នេះ បង្កដោយរថយន្តម៉ាកហ្វូសូ ពណ៌ផ្ទៃមេឃលាយខៀវ ពាក់ស្លាកលេខ ភ្នំពេញ 3B-5494 បើកបរដោយបុរសមិនស្គាល់អត្តសញ្ញាណម្នាក់។ មុនពេលកើតហេតុ រថយន្តបង្កបានធ្វើដំណើរពីលិចទៅកើត លុះមកដល់ចំណុចកើតហេតុ បានបើកវ៉ាឆ្វេង ក៏ជ្រុលទៅបុកជាមួយរថយន្តម៉ាកហ៊ីយ៉ុនដាយ ពណ៌ស ពាក់ស្លាកលេខ ក្រចេះ 3A-0247 បើកបរដោយបុរសមិនស្គាលអត្តសញ្ញាណដូចគ្នា ក្នុងទិសដៅបញ្ច្រាស់ទិសគ្នា តែមិនបណ្តាលឲ្យរងរបួសមនុស្សធ្ងន់ធ្ងរនោះទេ។
លោកបន្តថា ភ្លាមនោះ ក៏មានរថយន្តម៉ាកហ្វីសូ ១គ្រឿងទៀត ពណ៌ខៀវលាយស ពាក់ស្លាកលេខ ភ្នំពេញ 3A-3259 បើកបរដោយបុរសមិនស្គាល់អត្តសញ្ញាណ បើកពីកើតទៅលិចក្នុងល្បឿនលឿន ជាន់ហ្វ្រាំងមិនជាប់ក៏បុកពីក្រោយរថយន្តម៉ាកហ៊ីយ៉ុនដាយ ពាក់ស្លាកលេខ ក្រចេះ 3A-0247 ដែលកំពុងតែគ្រោះថ្នាក់ចរាចរណ៍ស្រាប់ផង ក៏បណ្តាលឲ្យព្រូរថយន្តម៉ាកហ្វូសូ ពាក់ស្លាកលេខ ភ្នំពេញ 3A-3259 កៀបជាប់នឹងកាប៊ីនរថយន្ត រងរបួសធ្ងន់តែម្ដង។
ក្រោយពេលកើតហេតុ កម្លាំងនគរបាលចរាចរណ៍ផ្លូវគោក សហការជាមួយកម្លាំងនគរបាលក្រុងពោធិ៍សាត់ និងកម្លាំងប៉ុស្តិ៍មូលដ្ឋាន បានចុះអន្តរាគមន៍សង្គ្រោះបន្ទាន់ភ្លាមៗ និងស្ទូចរថយន្តទាំង៣ យកមករក្សាទុក រងចាំដោះស្រាយនៅពេលក្រោយ៕
