(ភ្នំពេញ)៖ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃកម្ពុជា បានជំរុញឲ្យមាននូវអនុស្សរណៈ នៃការយោគយល់គ្នារវាងរដ្ឋសភាកម្ពុជា និងរដ្ឋសភាសាធារណកូរ៉េ ដើម្បីពង្រឹងកិច្ចសហប្រតិបត្តិការរដ្ឋសភាប្រទេសទាំងពីរកាន់តែសកម្ម ស៊ីជម្រៅ ទាំងកម្រិតទ្វេភាគី និងពហុភាគី ដោយយកផលប្រយោជន៍ពលរដ្ឋជាស្នូល។

សម្តេចប្រធានរដ្ឋសភា បានលើកឡើងយ៉ាងដូច្នេះ នៅក្នុងឱកាសដែលសម្ដេចអនុញ្ញាតឲ្យ លោក ផាក ជុងវូក (PARK Jung-Wook) ឯកអគ្គរដ្ឋទូត នៃសាធារណរដ្ឋកូរ៉េ ប្រចាំព្រះរាជាណាចក្រកម្ពុជា ដែលត្រូវចប់អាណត្តិ ចូលជួបសម្តែងការគួរសម និងជម្រាបលា នៅព្រឹកថ្ងៃទី១៧ ខែកក្កដា ឆ្នាំ២០២៥ នៅវិមានរដ្ឋសភា។

សម្តេចប្រធានរដ្ឋសភា គូសបញ្ជាក់ថា ទំនាក់ទំនងរដ្ឋសភា ដែលជាស្ថាប័នតំណាងឲ្យពលរដ្ឋមានសារៈសំខាន់ណាស់ នៅក្នុងបរិបទដែលសកលលោកកំពុងស្ថិតក្នុងស្ថានភាពមានហានិភ័យខ្ពស់ មានការប្រកួតប្រជែងខាងភូមិសាស្រ្តនយោបាយ សេដ្ឋកិច្ច និងបច្ចេកវិទ្យានោះ ហើយការងារការទូតសភា លើកកម្ពស់ការកិច្ចសន្ទនា គោលការណ៍ពហុនិយម នឹងចូលរួមចំណែកដល់ការកាត់បន្ថយការប្រឈមរបស់ប្រជាពលរដ្ឋ។

សម្តេចប្រធានរដ្ឋសភា ក៏បានវាយតម្លៃខ្ពស់ចំពោះលទ្ធផលការងារ ដែលលោកឯកអគ្គរដ្ឋទូតសម្រេចបាន មានសមិទ្ធផលសំខាន់ៗជាច្រើន ដែលកើតចេញពី កិច្ចខិតខំប្រឹងប្រែងយ៉ាងសកម្មរបស់ លោក និងសហការី ពិសេស ការដំឡើងកម្រិតទំនាក់ទំនងទ្វេភាគី «ភាពជាដៃគូយុទ្ធសាស្ត្រ» កាលពីខែឧសភា ឆ្នាំ២០២៤ កន្លងទៅ។ ការដំឡើងកម្រិតទំនាក់ទំនងនេះពិតជាមិនមែនជារឿងចៃដន្យ ឬងាយៗនោះទេ។ ការណ៍នេះបានឆ្លុះបញ្ចាំងយ៉ាងច្បាស់អំពីវឌ្ឍនភាព នៃទំនាក់ទំនង និងកិច្ចសហប្រតិបត្តិការទ្វេភាគី ដោយផ្អែកលើការជឿទុកចិត្តគ្នា ការគោរពគ្នា ការយោគយល់គ្នា ផ្តល់ផលប្រយោជន៍ឱ្យគ្នាទៅវិញទៅមក។

ជាការឆ្លើយតប លោក ផាក ជុងវូក បានថ្លែងអំណរគុណយ៉ាងជ្រាលជ្រៅ ជូនសម្តេចប្រធានរដ្ឋសភា ដែលបានអនុញ្ញាតឲ្យរូបលោក ចូលជួបពិភាក្សាការងារ និងជម្រាបលានៅក្នុងឱកាសនេះ។ លោក បានថ្លែងអំណរគុណជូនសម្តេចប្រធានរដ្ឋសភា ជូនពលរដ្ឋកម្ពុជា ក៏ដូចជារាជរដ្ឋាភិបាលកម្ពុជា ដែលបានរួមសហការយ៉ាងល្អនិងជិតស្និទ្ធ ធ្វើឲ្យបេសកកម្មការទូតរបស់លោកទទួលបានជោគជ័យ។

លោកឯកអគ្គរដ្ឋទូត បានយល់ស្របចំពោះប្រសាសន៍លើកឡើងរបស់ សម្តេចប្រធានរដ្ឋសភា នៅក្នុងការជំរុញឲ្យមាននូវអនុស្សរណៈនៃការយោគយល់គ្នារវាងរដ្ឋសភាប្រទេសទំាងពីរ។ លោក បន្តថា កម្ពុជា និងសាធារណរដ្ឋកូរ៉េ បានផ្លាស់ប្តូរដំណើរទស្សនកិច្ចគ្នាទៅវិញទៅមកនៅគ្រប់កម្រិត។ ជាមួយគ្នានេះ សម្តេចតេជោ ហ៊ុន សែន សម្តេចមហាបវរធិបតី ហ៊ុន ម៉ាណែត បានអញ្ជើញបំពេញទស្សនកិច្ចនៅសាធរាណរដ្ឋកូរ៉េ ហើយលោក គឹម ជីន ព្យូ (Kim Jin Pyo) ប្រធានរដ្ឋសភា នៃសាធារណរដ្ឋកូរ៉េ បានអញ្ជើញមកបំពេញទស្សនកិច្ចជាផ្លូវការ និងមិត្តភាព នៅកម្ពុជា កាលពីខែកញ្ញា ឆ្នាំ២០២៣។ លោកឯកអគ្គរដ្ឋទូត សង្ឃឹមថា សម្តេចប្រធានរដ្ឋសភា នឹងអញ្ជើញទៅបំពេញទស្សនកិច្ចផ្លូវការនិងមិត្តភាព នៅសាធារណរដ្ឋកូរ៉េ ក្នុងពេលសមស្របខាងមុខជាមិនខានឡើយ។

ជាការឆ្លើយតប សម្តេចមហារដ្ឋសភាធិការធិបតី បានថ្លែងអំណរគុណយ៉ាងជ្រាលជ្រៅ ជូនសាធារណរដ្ឋកូរ៉េ ដែលបានចូលរួមស្វែងរកសន្តិភាពនិងបានគំាទ្រដល់ការអភិវឌ្ឍរបស់កម្ពុជា។ សម្តេច សង្ឃឹមថា សាធារណរដ្ឋកូរ៉េ នឹងបន្តគំាទ្រដល់ការអភិវឌ្ឍធនធានមនុស្ស កសិកម្មទំនើប បច្ចេកវិទ្យា និងនវានុវត្តន៍ ដល់កម្ពុជាបន្ថែមទៀត។ ស្ពានឆ្លងទន្លេសាប មិត្តភាពកម្ពុជា-កូរ៉េ ជាជំនួយរបស់សាធារណរដ្ឋកូរ៉េ ដែលនឹងបើកការដ្ឋានសាងសង់ឆាប់ៗនេះ នឹងផ្តល់នូវប្រយោជន៍ជាច្រើនដល់ប្រជាពលរដ្ឋ ជាពិសេសលើកកម្ពស់ជីវភាព និងសេដ្ឋកិច្ចសង្គមជាតិ ។

ក្នុងជំនួបដដែល សម្តេចប្រធានរដ្ឋសភា បានស្នើដល់សាធារណកូរ៉េ បង្កើននូវចំនួនកូតាពលរដ្ឋខ្មែរទៅធ្វើការនៅសាធារណររដ្ឋកូរ៉េ។ សម្ដេចបន្តថា ការទៅបម្រើការងារនៅសាធារណកូរ៉េ មិនត្រឹមទទួលបាននូវប្រាក់ចំណូលខ្ពស់ប៉ុណ្ណោះទេ តែបានផ្តល់នូវបទពិសោធន៍ ជំនាញបច្ចេកទេសខ្ពស់ ដល់ពលករយកមកអនុវត្តនៅកម្ពុជាផងដែរ។

ឆ្លៀតក្នុងឱកាសនោះ សម្តេចរដ្ឋសភាធិបតី បានលើកឡើងពី ស្ថានភាពជាក់ស្ដែងនៃ ជម្លោះព្រំដែនកម្ពុជា និងថៃផងដែរ។ ដោយ សម្តេចបានគូសបញ្ជាក់ថា ដូចដែលលោកឯកអគ្គរដ្ឋទូត បានដឹងខ្លះៗអំពី ទំនាស់បញ្ហាព្រំដែនកម្ពុជា-ថៃ នាពេលថ្មីៗនេះ។ តាមពិតទៅបញ្ហានេះបានកើតមានឡើងជាយូរមកហើយ និងបានអូសបន្លាយរហូតមកដល់បច្ចុប្បន្ន។ ភាគីកម្ពុជាមិនចង់សើរើបញ្ហានេះឡើយ។ កម្ពុជាតែងតែចង់រួមរស់ជាមួយប្រទេសជិតខាងដោយសន្តិភាព និងភាពជាអ្នកជិតខាងល្អ ហើយបានតាំងចិត្តខ្ពស់ក្នុងការកសាងខ្សែបន្ទាត់ព្រំដែនឱ្យទៅជា ព្រំដែនមិត្តភាព សន្តិភាព កិច្ចសហប្រតិបត្តិការ និងការអភិវឌ្ឍ។

ប៉ុន្តែភាគីថៃមានមហិច្ឆតា តែងតែចិញ្ជឹមចិត្តចង់បាន ឈ្លានពាន ដោយបានបង្កទំនាស់ ជម្លោះជាហូរហែរហូតដល់បច្ចុប្បន្ន។ ថៃបានបដិសេធមិនប្រើប្រាស់ផែនទី ដែលទទួលស្គាល់ដោយអន្តរជាតិ គូសដោយបារំាង-សៀម។ លើសពីនេះ ថៃបានពង្រីកបញ្ហាព្រំដែនទៅជាបញ្ហាសេដ្ឋកិច្ច ពាណិជ្ជកម្ម បិទច្រកព្រំដែនជាឯកតោភាគី ប៉ះពាល់ដល់ទំនាក់ទំនងនិងជីវភាពប្រជាពលរដ្ឋទំាងសងខាង។ កម្ពុជាសង្ឃឹមថា ភាគីថៃនឹងដោះស្រាយបញ្ហាដោយសន្តិវិធី បើកច្រកព្រំដែន ដែលខ្លួនបានបិទឡើងវិញដើម្បីឱ្យស្ថានភាពវិលទៅដូចដើមវិញ។ នេះបើតាមការលើកឡើងរបស់ សម្តេចរដ្ឋសភាធិបតី។

បន្ទាប់ពីស្តាប់ដោយការយកចិត្តទុកដាក់ លោក ផាក ជុងវូក បានលើកឡើងថា លោកមានសុទិដ្ឋនិយមថា ជម្លោះព្រំដែនកម្ពុជានិងថៃ នឹងត្រូវដោះស្រាយបានតាមសន្តិវិធី។ លោក បានថ្លែងការកោតសរសើរ និងវាយតម្លៃខ្ពស់ ចំពោះកម្ពុជា ដែលបានរៀបចំ មហាសន្និបាតគណបក្សនយោបាយអាស៊ី ហៅកាត់ថា ICAPPនិង សម័យប្រជុំពេញអង្គលើកទី១១ នៃសភាអន្តរជាតិ ដើម្បីភាពអត់ឱននិងសន្តិភាព ហៅកាត់ថា IPTP11 ប្រកបដោយអត្ថន័យ បង្ហាញពីការចូលរួមចំណែកដ៏សំខាន់របស់កម្ពុជានៅក្នុងការលើកកម្ពស់សន្តិភាព ជូនមនុស្សជាតិនិងភពផែនដី៕