(កំពត)៖ កម្លាំងនគរបាលខេត្ត ក្រោមបទបញ្ជារបស់លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្ត និងដោយមានការសម្របសម្រួល ពីលោកព្រះរាជអាជ្ញារង អមសាលាដំបូងខេត្តកំពត ខាន់ សុផល កម្លាំងជំនាញឈានទៅបង្ក្រាបបានករណីចែកចាយ និងប្រើប្រាស់គ្រឿងញៀន ឃាត់ខ្លួនជនសង្ស័យ៤នាក់ ស្រីម្នាក់ ដកហូតវត្ថុតាង មានថ្នាំញៀនមួយចំនួន។
ប្រតិបត្តិការនេះ ត្រូវបានធ្វើឡើងនៅម៉ោង៧៖៤០នាទីយប់ ថ្ងៃទី១៦ ខែវិច្ឆិកា ឆ្នាំ២០១៦ ស្ថិតក្នុងភូមិកំពង់បាយខាងជើង សង្កាត់កំពង់បាយ ក្រុងកំពត។
មន្ត្រីនគរបាល នៃការិយាល័យប្រឆាំងគ្រឿងញៀនខេត្ត បានប្រាប់ឲ្យដឹងថា ជនសង្ស័យទាំង៤នាក់ ដែលឃាត់ខ្លួនបាន ទី១៖ឈ្មោះ អ៊ុ វីរៈ អាយុ៣២ឆ្នាំ ទី២៖ឈ្មោះ តាំង យុង អាយុ៤១ឆ្នាំ ទី៣៖ឈ្មោះ យ៉ាន សុភ័ក្រ អាយុ២៣ឆ្នាំ និងទី៤៖ឈ្មោះ សៀង ណា ភេទស្រី អាយុ៤៤ឆ្នាំ។
នគរបាលបញ្ជាក់ថា ក្រោយឃាត់ខ្លួនកម្លាំងនគរបាលជំនាញ ដកហូតបាន ម្សៅក្រាមពណ៌ស២កញ្ចប់, ថ្នាំញៀនចម្រាញ់រួច៣កញ្ចប់, ជញ្ជីងថ្លឹង១គ្រឿង, គ្រាប់កាំភ្លើងK54ចំនួន ១១គ្រាប់, គ្រាប់កាំភ្លើងK59 ១គ្រាប់, ស្នាប់ដៃ១, ស្រោមកាំភ្លើងខ្លីពណ៌ខ្មៅ១, ក្រដាសអាលុយមីញ៉ូម ២ដុំ និងសម្ភារសម្រាប់ជក់គ្រឿងញៀន មួយចំនួនទៀត។
បច្ចុប្បន្នជនសង្ស័យទាំង៤នាក់ កំពុងកសាងសំណុំរឿង ដើម្បីចាត់ការបន្ដតាមនីតិវិធី៕
