(ភ្នំពេញ)៖ នៅព្រឹកថ្ងៃទី១៦ ខែវិច្ឆិកា ឆ្នាំ២០១៦នេះ សម្ដេចកិត្តិព្រឹទ្ធិបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឱ្យ លោកវេជ្ជបណ្ឌិត អ៊ុយ សំអាត នាយក នាយកដ្ឋានគ្រប់គ្រងគ្រោះមហន្តរាយ នៃកាកបាទក្រហមកម្ពុជា និងសហការី រួមជាមួយមន្ត្រី អនុសាខាកាកបាទក្រហមកម្ពុជា ខណ្ឌច្បារអំពៅ ចូលរួមរំលែកទុក្ខជាមួយ ក្រុមគ្រួសារសពកីឡាករអុំទូក.ង ២នាក់ រស់នៅភូមិព្រែកថ្មី១ សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ ដែលបានទទួលមរណភាព កាលពីថ្ងៃទី១៣ ខែវិច្ឆិកា ឆ្នាំ២០១៦ ដោយឧបទ្ទវហេតុទូកប៉ះគ្នា នៅទន្លេ៤មុខ ខាងមុខព្រះបរមរាជវាំង។
សពជនរងគ្រោះទាំង ២នាក់ មានឈ្មោះ៖ ១ ឈឿន សុខុម (ហៅ ចន) ភេទប្រុស អាយុ ៣៣ឆ្នាំ មុខរបរជាអ្នកនេសាទ និងទី២-សុខ ច័ន្ទចេស្តា ភេទប្រុស អាយុ ១៧ឆ្នាំ មុខរបរជាអ្នកធ្វើចំការ។
ស្ថិតក្នុងវេលាដ៏ក្រៀមក្រំនេះ លោកវេជ្ជបណ្ឌិត អ៊ុយ សំអាត បានមានប្រសាសន៍ផ្តាំផ្ញើសួរសុខទុក្ខ និងសម្ដែងនូវមរណៈទុក្ខយ៉ាងក្រៀមក្រំពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាមួយក្រុមគ្រួសារនៃសព ដែលបានបាត់បង់សាច់ញាតិជាទីស្រឡាញ់ និងសូមបួងសួងដល់វិញ្ញាណក្ខន្ធសព សូមឲ្យបានទៅកាន់សុគតិភព កុំបីឃ្លៀងឃ្លាតឡើយ។
ទន្ទឹមនឹងនោះ សម្តេចកិត្តិព្រឹទ្ធបណ្ឌិត បានចូលបុណ្យនូវបច្ច័យ និងគ្រឿងឧបភោគ-បរិភោគមួយចំនួន សម្រាប់ក្រុមគ្រួសារសពនីមួយៗដើម្បីរៀបចំពិធីបុណ្យ៧ថ្ងៃ នៅថ្ងៃស្អែកឱ្យបានសមរម្យទៅតាមប្រពៃណី។
ក្រុមគ្រួសារនៃសពបានសម្ដែង នូវការដឹងគុណយ៉ាងជ្រាលជ្រៅចំពោះ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលមានទឹកចិត្ត ជ្រះថ្លា សណ្តោសប្រណី ដែលបានចាត់ឲ្យ សហការី នាំយកបច្ច័យ និងគ្រឿងឧបភោគ-បរិភោគមកចូលបុណ្យ និងសូមជូនពរដល់ សម្ដេចកិត្តិព្រឹទ្ធបណ្ឌិត សូមជួបប្រទះតែសេចក្តីសុខ អាយុយ៉ឺនយូរ ដើម្បីបន្តដឹកនាំកាកបាទក្រហមកម្ពុជាជួយដល់ជនរងគ្រោះ នៅគ្រប់ទិសទីបន្ថែមទៀត៕
