(កំពត)៖ ស្នងការនគរបាលខេត្តកំពត លោកឧត្តមសេនីយ៍ ម៉ៅ ច័ន្ទមធុរិទ្ធ បានបញ្ជាក់ថា នៅរសៀលថ្ងៃទី១៥ ខែវិច្ឆិកា ឆ្នាំ២០១៦ សពស្រ្តីរងគ្រោះដែលជាភរិយារបស់នាយការិយាល័យសុខាភិបាលខេត្តកំពត ត្រូវបានរកឃើញហើយ ប៉ុន្តែកូនរបស់គាត់នៅមិនទាន់រកឃើញនោះទេ ដោយកម្លាំងសមត្ថកិច្ច បាននិងកំពុងតាមរកបន្តទៀត។
ដូច្នេះករណីគ្រោះថ្នាក់មួយនេះ អ្នកស្លាប់មានចំនួន៤នាក់ ហើយរកឃើញសព៣នាក់ហើយ គិតត្រឹមរសៀលថ្ងៃនេះ។ ជាមួយគ្នានេះ សម្រាប់ម្ចាស់ទូកទេសចរណ៍មួយនេះ ត្រូវបានកម្លាំងសមត្ថកិច្ចឃាត់ខ្លួនផងដែរ ដើម្បីចាត់ការតាមច្បាប់។
សូមបញ្ជាក់ថា នៅយប់ថ្ងៃទី១៤ ខែវិច្ឆិកា ឆ្នាំ២០១៦ មានករណីគ្រោះថ្នាក់មួយបានកើតឡើង ស្ថិតនៅតាមមាត់សមុទ្រ ជិតស្ពានថ្មី ក្រុងកំពត ខេត្តកំពត រហូតស្លាប់ស្រ្តីវ័យចំណាស់ម្នាក់ និងបាត់ខ្លួន២នាក់ ក្រោយទូកទេសចរណ៍ដ៏ធំមួយផ្ទុកមនុស្សជាង៧០នាក់ បានគឿងជាមួយខ្សាច់ ហើយផ្អៀងធ្វើឲ្យមានការជ្រួលច្របល់ អ្នកនៅលើទូក រហូតលោតចូលទឹកតែម្តង។
ស្នងការនគរបាលខេត្តកំពត លោកឧត្តមសេនីយ៍ ម៉ៅ ច័ន្ទមធុរិទ្ធ បានបញ្ជាក់នៅថា ស្រ្តីវ័យចំណាស់ម្នាក់បានស្លាប់ នៅពេលកម្លាំងរបស់លោក បញ្ជូនទៅដល់មន្ទីរពេទ្យ ដោយសារធ្លាក់ចូលទឹក ហើយ២នាក់ទៀត ដែលជាប្រពន្ធ និងកូនរបស់នាយការិយាល័យសុខាភិបាល នៃស្នងការដ្ឋាននគរបាលខេត្ត បានបាត់ខ្លួន ទើបតែរកឃើញសពម្តាយនៅរសៀលនេះ។
លោកឧត្តមសេនីយ៍ស្នងការ បានបន្តថា មូលហេតុដែលនាំឲ្យមានករណីនេះកើតឡើង ដោយសារតែទូកទេសចរណ៍មួយនេះ ក្រោយត្រឡប់មកពីមើលអំពិលអំពែក តាមមាត់សមុទ្រនោះ បានគឿងខ្សាច់ (ក្រោយទឹកនាច) ស្រាប់តែបណ្តាលឲ្យទូកផ្អៀង ហើយមានអ្នកខ្លះធ្លាក់ចូលទឹក ពេលនោះក៏ម្នាក់ៗឆោឡោយ៉ាងខ្លាំង ដោយគិតថាទូកលិច ទើបម្នាក់ៗនាំគ្នាលោតចេញពីទូក រហូតមានស្លាប់ និងបាត់ខ្លួនតែម្តង៕
