(ឧត្តរមានជ័យ)៖ លោក ម៉ែន លី ស្នងការដ្ឋាននគរបាលខេត្តឧត្តរមានជ័យ បានចាត់កម្លាំងជំនាញក្រុងសំរោង សហការជាមួយកម្លាំនគរបាលមូលដ្ឋាល ចុះបង្ក្រាបករណីចែកចាយគ្រឿងញៀនដ៏សកម្ម ត្រង់ចំណុចក្រោមជើងភ្នំបាក់ ស្ថិតនៅភូមិគោកចាន់រី សង្កាត់កូនក្រៀល ក្រុងសំរោង ដោយបានឃាត់ខ្លួនជនសង្ស័យចំនួន ៣នាក់ រួមជាមួយថ្នាំញៀនជាច្រើនរយគ្រាប់ទៀត។
ថ្លែងប្រាប់ភ្នាក់ងារ Fresh News នៅថ្ងៃទី១១ ខែវិច្ឆិកា ឆ្នាំ២០១៦នេះ លោក ម៉ែន លី បានឲ្យដឹងថា ជនសង្ស័យ ទី១.ឈ្មោះ ប៉ុក សីរ៉ា អាយុ៣៧ឆ្នាំ រស់នៅភូមិកើតហេតុខាងលើ (មុខសញ្ញសកម្ម និងមិនរាងចាល), ទី២.ឈ្មោះ ចាន់ ភារម្យ ភេទស្រី អាយុ៣៧ឆ្នាំ រស់នៅភូមិកើតហេតុខាងលើ និងទី៣.ឈ្មោះ វ៉ាន់ ខន អាយុ១៩ឆ្នាំ រស់នៅភូមិគោកអំពិល សង្កាត់កូនគ្រៀល ក្រុងសំរោង។
លោកស្នងការបានបន្តថា សមត្ថកិច្ចដកហូតបានវត្ថុតាងរួមមាន៖ ថ្នាំញៀនមេតំហ្វេតាមីនគ្រាប់ ពណ៌ក្រហមចំនួន ១០៧គ្រាប់, ថ្នាំញៀនមេតំហ្វេតាមីនគ្រាប់ ពណ៌បៃតងចំនួន ១គ្រាប់, ថ្នាំម៉ាទឹកកកចំនួន ១៨កញ្ជប់ទៀត, បំពង់ជក់ថ្នាំចំនួន ៣, ដែកកេះ ១ដើម និងទូរស័ព្ទដៃចំនួន ៣គ្រឿង។
បច្ចុប្បន្ន ជនសង្ស័យ និងវត្ថុតាងខាងលើ ត្រូវបានកម្លាំងសមត្ថកិច្ចនាំទៅកាន់អធិការដ្ឋាននគរបាលក្រុងសំរោង ដើម្បីកសាងសំណុំរឿងបញ្ជូនទៅតុលាការ បន្តនីតិវិធីតាមច្បាប់៕
