(ភ្នំពេញ)៖ ការចុះបញ្ជិកាជី​ និងថ្នាំកសិកម្ម​ គឺជាលក្ខណ្ឌតម្រូវសម្រាប់ក្រុមហ៊ុន​ទាំងអស់ដែលធ្វើពាណិជ្ជកម្ម ដើម្បីធានាគុណភាព​ និងប្រសិទ្ធភាពផលិតផលជី​ និងថ្នាំកសិកម្មផង​ និងដើម្បីផ្តល់ទំនុកចិត្តដល់ប្រជាកសិករ​ផង​។

រាល់ផលិតផលជី​ និងថ្នាំកសិកម្ម​ទាំងអស់​ សុទ្ធតែឆ្លងកាត់ការពិនិត្យក្នុងមន្ទីរពិសោធន៍​របស់ក្រសួងកសិកម្ម​ ដើម្បីពិនិត្យផ្ទៀងផ្ទាត់គុណភាព​ ប្រសិទ្ធភាព​ និងសុវត្ថិភាព​ មុននឹងអនុញ្ញាតឱ្យក្រមហ៊ុននាំចូលយកមកចែកចាយ ដល់ដេប៉ូនៅតាមខេត្ត​ ស្រុក​ និងឃុំ​នៅទូទាំងប្រទេស​ និងលក់ជូនដល់ប្រជាកសិករ។

ជាងនេះទៀត​ ក្រសួងមានយន្តការតាមដាន​គុណភាពជី​ និងថ្នាំកសិកម្ម ដោយចាត់មន្ត្រីចុះយកសំណាកនៅតាមឃ្លាំងស្តុក​ និងដេប៉ូចែកចាយជារឿយៗ​ ដេីម្បីពិនិត្យគុណភាព​ និងធានាថា​ ផលិតផលទាំងនោះមានគុណភាពល្អ​ និងទុកដាក់បានត្រឹមត្រូវ​។

កាន់តែសំខាន់ជាងនេះទៀត​ ក្រសួងបានសម្រួលនីតិវិធី​ និងកាត់បន្ថយពេលវេលាក្នុងការចុះបញ្ជិកាជី​ និងថ្នាំកសិកម្ម​ ដើម្បីបង្កលក្ខណៈឱ្យក្រុមហ៊ុនអាចនាំចូល​បានលឿន​ និងផ្គត់ផ្គង់ចែកចាយបានទាន់ពេល វេលាជូនដល់ប្រជាកសិករ។

សូមស្តាប់ចំណាប់អារម្មណ៍របស់លោក​ សូ រិទ្ធឆាដា តំណាងក្រុមហ៊ុន ជីង ប៉ាង ដែល​លើកឡើងពីនីតិវិធីចុះបញ្ជិកាជី​ និងថ្នាំកសិកម្មនៅក្រសួងកសិកម្ម៕