(ភ្នំពេញ)៖ សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា នៅព្រឹកថ្ងៃទី២ ខែមិថុនា ឆ្នាំ២០២៥ បានថ្លែងថា​ហេតុការណ៍នៃការប៉ះទង្គិច​ជាមួយ​ថៃ បានស្តែងឱ្យឃើញច្បាស់ថានរណាស្នេហាជាតិពិតប្រាកដ,​ ពេលកម្ពុជាមិនវាយតបគេថាកំសាក ពេលកម្ពុជាវាយតប គេថាប្រើហិង្សា។

ការថ្លែងបែបនេះរបស់សម្ដេច បានធ្វើឡើងក្នុងសមាជជាលើកដំបូងជជែកអំពីប្រព័ន្ធ​គាំពារសង្គម, សេដ្ឋកិច្ចក្រៅប្រព័ន្ធ និងកសិកម្ម របស់រដ្ឋសភា និងព្រឹទ្ធសភា។

ចំពោះមុខអង្គពិធី, សម្ដេចតេជោ បានថ្លែងថាគ្មានប្រទេសណាមួយដកទ័ពចេញទឹកដីរបស់ខ្លួននោះទេ តួយ៉ាងតំបន់មុំបីនេះ កន្លែងសាលារួមចិត្ត ខណៈដែលព្រំដែនមិនមែនស្ថិតនៅតំបន់ហ្នឹងនោះទេ។

សម្ដេចប្រធានព្រឹទ្ធសភា បានសង្កត់ធ្ងន់ថា៖ «នេះមិនមែនជាការបំផុសកំហឹងនោះទេ តែជារឿងអធិបតេយ្យជាតិ ហើយពេលនេះយើងនឹងបានដឹងច្បាស់ថា អ្នកណាស្នេហាជាតិ អ្នកណាស្រឡាញ់ជាតិពិតប្រាកដ។ ពេលយើងមិនវាយបក គេថាយើងកំសាកមិនហ៊ានវៃ ពេលដែលយើងវៃ គេថាយើងប្រើហិង្សា, ពេលដែលយើងមិនប្ដឹងគេថាយើងមិនហ៊ាន ពេលដែលយើងប្ដឹងគេថាយើងបង្ករឿង អាហ្នឹងពួកខាងក្នុងនេះ (ក្រុមជ្រុលនិយមខ្មែរក្រៅប្រទេស)»។

បើតាមប្រសាសន៍របស់សម្ដេចតេជោ ហ៊ុន​ សែន, កម្ពុជាមិនបោះបង់ចោលនូវយន្តការចរចារណាមួយទេ ប៉ុន្តែការចរចារលើកនេះ កម្ពុជានឹងបបួលភាគីថៃ យកចំណុចរស៊ើបទាំងបួនកន្លែងនេះ (តំបន់មុំបី, ប្រាសាទតាមាន់ធំ, ប្រាសាទតាមាន់តូច និងតាក្របី) ទៅកាន់តុលាការ រីឯគណៈ​កម្ម​ការ​​ព្រំដែនចម្រុះ (JBC)​ នៅបន្តពិនិត្យតាមបង្គោល និងបោះបង្កោលព្រំដែនបន្តទៀត៕