(ភ្នំពេញ)៖ នាយករដ្ឋមន្ត្រីកម្ពុជា, ឡាវ និងវៀតណាម បានបង្ហាញការពេញចិត្តចំពោះទំនាក់ទំនងល្អរវាងប្រទេសទាំង៣ ដែលមានភូមិផងរបងជាប់គ្នា។
ការគូសរំលេចនេះ បានធ្វើឡើងក្នុងជំនួបពិសារអាហារការងារពេលព្រឹក រវាងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកបណ្ឌិត សនសៃ ស៊ីផាន់ដន (Sonexay Siphandone) នាយករដ្ឋមន្ត្រី ឡាវ និងលោក ផាម មិញ ជីញ (Pham Minh Chinh) នាយករដ្ឋមន្ត្រី វៀតណាម ក្នុងឱកាសអញ្ជើញចូលរួមកិច្ចប្រជុំកំពូលអាស៊ានលើកទី៤៦ និងកិច្ចប្រជុំកំពូលពាក់ព័ន្ធ នៅទីក្រុងគូឡាឡាំពួ ប្រទេសម៉ាឡេស៊ី នាព្រឹកថ្ងៃទី២៦ ខែឧសភា ឆ្នាំ២០២៥។ នាយករដ្ឋមន្ត្រីកម្ពុជា ឡាវ និងវៀតណាម តែងតែឆ្លៀតជួបពិភាក្សាការងារ រាល់ពេលអញ្ជើញចូលរួមកិច្ចប្រជុំកំពូលអាស៊ាន និងកិច្ចប្រជុំដទៃទៀត តាំងពីនាយករដ្ឋមន្ត្រីមុនៗមកម្ល៉េះ។ ជំនួបដែលស្ទើរក្លាយជាប្រពៃណីនេះ ធ្វើឡើងដើម្បីរឹតចំណងមេត្រីភាព និងកិច្ចសហការរវាងប្រទេសទាំង៣។
ក្នុងជំនួបនេះក្រៅពីបង្ហាញការពេញចិត្តចំពោះការរីកចម្រើននៃទំនាក់ទំនងហើយនោះ នាយករដ្ឋមន្ត្រីប្រទេសទាំង៣ បានវាយតម្លៃខ្ពស់ចំពោះវឌ្ឍនភាពនៃកិច្ចសហប្រតិបត្តិការលើគ្រប់វិស័យដែលត្រូវបានពង្រឹង និងពង្រីកជាបន្តបន្ទាប់។ ជាមួយគ្នានេះ មេដឹកនាំទាំងបី បានពិភាក្សាអំពីការជំរុញកិច្ចសហប្រតិបត្តិការបន្ថែមទៀត លើវិស័យសក្ដានុពលជាច្រើន រួមមាន៖ វិស័យពាណិជ្ជកម្ម, ការតភ្ជាប់ហេដ្ឋារចនាសម្ព័ន្ធ, ថាមពល (អគ្គិសនី), ទេសចរណ៍ ព្រមទាំងសន្តិសុខ និងការពារជាតិ។
ប្រមុខរាជរដ្ឋាភិបាលទាំងបី ក៏បានផ្លាស់ប្ដូរមតិយោបល់លើបញ្ហាតំបន់ និងអន្តរជាតិ៕
