(ភ្នំពេញ)៖ ទីបំផុត ! សាលាដំបូងក្រុងភ្នំពេញ នៅប៉ុន្មាននាទីមុននេះ បានសម្រេចពិន័យប្រាក់ លោក សម រង្ស៉ី ១០លានរៀល និងបង្គាប់ឱ្យសងជំងឺចិត្ត ទៅជនរងគ្រោះ ១៥លានរៀល ពាក់ព័ន្ធនឹងករណីបរិហារសម្តេចតេជោ ហ៊ុន សែន ទិញ Like ក្លែងក្លាយ នៅលើបណ្តាញសង្គម Facebook ដើម្បីបង្កើនប្រជាប្រិយភាព។
សវនាការនៃសំណុំរឿងនេះ បានធ្វើឡើងនៅព្រឹកថ្ងៃទី០៨ ខែវិច្ឆិកា ឆ្នាំ២០១៦ ដោយមាន លោក អ៉ឹម វណ្ណៈ ជាចៅក្រម ជំនុំជម្រះ។ ក្នុងសវនាការនោះ លោក សោម សឿន ដែលជាម្ចាស់បណ្តឹងតំណាងសម្តេចតេជោ ហ៊ុន សែនស្នើឱ្យ តុលាការផ្តន្ទាទោស លោក សម រង្ស៊ី តាមច្បាប់និងទាមទារសំណងជំងឺចិត្តចំនួន២០លានរៀល។
ប៉ុន្តែទោះជាយ៉ាងណា តុលាការគ្រាន់តែចោទប្រកាន់ លោក សម រង្ស៉ី ពីបទបរិហារកេរ្តិ៍ជាសាធារណៈតែប៉ុណ្ណោះ ដែលបទល្មើស «បរិហារកេរ្តិ៍ជាសាធារណៈ» នេះ មិនតម្រូវឱ្យជាប់ពន្ធនាគារនោះទេ។
គួររំឮកថា កាលពីថ្ងៃទី១០ ខែមីនា ឆ្នាំ២០១៦ លោក សោម សឿន អាយុ៦៤ឆ្នាំ ជារដ្ឋមន្ត្រីអមនាយករដ្ឋមន្ត្រី បានប្តឹងលោក សម រង្ស៊ី ប្រធានគណបក្សសង្គ្រោះជាតិ ដោយភ្ជាប់ការបង្ហោះផ្សាយព័ត៌មានលើទំព័រហ្វេសប៊ុករបស់លោក សម រង្ស៊ី កាលពីថ្ងៃទី៩ ខែមីនា ឆ្នាំ២០១៦។
ក្នុងពាក្យបណ្ដឹង បានបញ្ជាក់ថា នៅថ្ងៃទី៩ ខែមីនា ឆ្នាំ២០១៦ នៅលើទំព័រហ្វេសប៊ុករបស់លោកសម រង្ស៊ី (Sam Rainsy) បានបង្ហោះអត្ថបទ ដែលមានខ្លឹមសារមូលបង្កាច់ខុសពីការពិត ដែលចោទប្រកាន់ លោក សោម សឿន ថា បានណែនាំដល់មន្ត្រី អ្នកគាំទ្រ និងបណ្តាញ រួមទាំងមន្ត្រីរាជការស៊ីវិល ប៉ូលិសនិងទាហាន ដើម្បីបង្កើតគណនីក្លែងក្លាយ ក្នុងគោលបំណងផ្តល់ការ Like សិប្បនិម្មិតដល់ទំព័រហ្វេសប៊ុករបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដោយភ្ជាប់ជាមួយការអត្ថាធិប្បាយ ថា Like មួយចំនួនធំដែលបង្ហាញលើទំព័រហ្វេសប៊ុករបស់សម្តេច គឺបានមកពីការទិញ ឬ ជួលមនុស្សក្រីក្រ ដែលអត់ការងារធ្វើឲ្យបង្កើត Accounts (គណនី) Facebook ក្លែងក្លាយដើម្បីផ្ដល់ Like សិប្បនិម្មិត ក្លែងបន្លំជូនសម្ដេច។
ក្នុងពាក្យបណ្ដឹង បានចាត់ទុកថា ការបង្ហោះនេះបានធ្វើឲ្យប៉ះពាល់ដល់កិត្តិយសថ្នាក់ដឹកនាំជាតិ និងលោក សោម សឿន យ៉ាងធ្ងន់ធ្ងរ៕
