(ភ្នំពេញ)៖ លោក ប៉ា សុជាតិវង្ស អភិបាលរាជធានីភ្នំពេញ បានថ្លែងថា តាមការវាយតម្លៃរបស់គណៈកម្មាធិការជំនាញ ព្រះរាជពិធីបុណ្យអុំទូក បណ្ដែតប្រទីត សំពះព្រះខែ និងអកអំបុក ដែលនឹងប្រព្រឹត្តិទៅនៅថ្ងៃទី១៣ ដល់ថ្ងៃទី១៥ ខែវិច្ឆិកា ឆ្នាំ២០១៦ខាងមុខនេះ នឹងមានប្រជាពលរដ្ឋចូលរួមទស្សនា និងដើរកម្សាន្ដ ក្នុងរាជធានីភ្នំពេញ ប្រមាណជាង២លាននាក់។
នេះបើតាម លោក ប៉ា សុជាតិវង្ស ថ្លែងបា្រប់ក្រុមអ្នកសារព័ត៌មាន នៅព្រឹកថ្ងៃទី៨ ខែវិច្ឆិកា ឆ្នាំ២០១៦នេះ ក្រោយបញ្ចប់កិច្ចប្រជុំ ត្រៀមកម្លាំងការពារ ព្រះរាជពិធីបុណ្យអុំទូក អកអំបុក សំពះព្រះខែ នៅថ្ងៃទី១៣-១៤-១៥ វិចិ្ឆកា ឆ្នាំ២០១៦ខាងមុខនេះ។
លោកអភិបាលរាជធានី បានលើកឡើងថា «តាមការវាយតម្លៃ ខ្ញុំគិតថាក្នុងឆ្នាំនេះ បងប្អូនប្រជាពលរដ្ឋយើង នឹងប្រហែលជាមកលេងកម្សាន្ដ ក្នុងពិធីបុណ្យអុំទូកនេះ ប្រមាណជាង២លាននាក់ ហើយគម្រោងនេះ បើប្រៀបធៀបទៅនឹងឆ្នាំមុនៗ ក៏ប្រហាក់ប្រហែលគ្នាដែរ»។
លោក ប៉ា សុជាតិវង្ស បញ្ជាក់ថា ចំនួនអ្នកកម្សាន្តកើនឡើងនេះ ដោយសារបញ្ហាបង្កបង្កើនផល របស់ប្រជាពលរដ្ឋ នៅតាមបណ្ដាខេត្ត មិនមានបញ្ហាប្រឈមនឹងវិបត្តិធម្មជាតិ ហើយម៉្យាងទៀត ជីវភាពប្រជាពលរដ្ឋមានភាពល្អប្រសើរ ស្របពេលដែលកម្ពុជា មានស្ថេរភាពនយោបាយ មានសុខសន្ដិភាព។
ជាមួយនឹងព្រះរាជពិធីបុណ្យទូកខាងមុខនេះ អភិបាលរាជធានី បានប្រកាសថា រដ្ឋបាលរាជធានីភ្នំពេញ នឹងប្រកាសផ្អាកគ្រប់ការដ្ឋានសាងសង់ និងការចរាចររថយន្តដឹកជញ្ជូនសម្ភារសាងសង់ធំៗទាំងអស់ ក្នុងរាជធានីភ្នំពេញ ចាប់ពីថ្ងៃទី១២ ដល់ថ្ងៃទី១៦ ខែវិច្ឆិកា ឆ្នាំ២០១៦ ដើម្បីបង្កលក្ខណៈងាយស្រួល ដល់បងប្អូនប្រជាពលរដ្ឋ ដែលមកកម្សាន្ត។
សូមជម្រាបថា ក្នុងឱកាសប្រារព្ធព្រះរាជពិធីបុណ្យអុំទូក ដែលរៀបចំឡើងចាប់ពីថ្ងៃទី១៣-១៤-១៥ ខែវិច្ឆិកា ឆ្នាំ២០១៦ សមត្ថកិច្ចត្រៀមកម្លាំងជាង១ម៉ឺននាក់ ដើម្បីការពារសន្តិសុខ និងសណ្តាប់ធ្នាប់៕
