(ភ្នំពេញ)៖ លោក ជៀម ឡាម៉ាទីន ទីប្រឹក្សាទទួលបន្ទុកកិច្ចការពលករ នៃស្ថានទូតកម្ពុជានៅបាងកក បានថ្លៃងឲ្យដឹងថា កាលពីយប់ថ្ងៃទី ២៥ ខែតុលា ២០១៦ ពលករខ្មែរម្នាក់ឈ្មោះ ចាន់ រស្មីម៉េងហ៊ាង (ហៅដំ) អាយុ២២ឆ្នាំ មានស្រុកកំណើតនៅខេត្តបន្ទាយមានជ័យ ត្រូវបានពលករមីយ៉ាន់ម៉ាម្នាក់ ចាក់នឹងកាំបិតបណ្តាលឲ្យរបួសជាទម្ងន់ ហើយត្រូវបានបញ្ជូនទៅព្យាបាលនៅមន្ទីរពេទ្យឈុលប្រាក់ថាន ក្នុងខេត្តនន្ទបុរី (Nonthaburi) ។
ពលកររូបនេះចូលមកប្រទេសថៃ កាលពីខែមេសា ឆ្នាំ២០១៦ ដោយពុំមានឯកសារអ្វីទាំងអស់ ហើយធ្វើការខុសច្បាប់ជាមួយក្រុមហ៊ុនជញ្ជូនសំរាមមួយនៅជាយក្រុងបាងកក ជាមួយនឹងជនជនដៃដល់ជាជនជាតិមីយ៉ាន់ម៉ា ជាពលករខុសច្បាប់ដូចគ្នា។
ស្ថានទូតបានចាត់មន្ត្រីទៅសួរសុខទុក្ខពលកររងគ្រោះនៅមន្ទីរពេទ្យ ដោយបាននាំយកអំណោយជាទឹកប្រាក់ចំនួន៧,៥០០បាត ឧបត្ថម្ភដល់ជនរងគ្រោះ។ គិតត្រឹមថ្ងៃទី០១ ខែវិច្ឆិកា ថ្លៃព្យាបាលបានកើន ដល់ចំនួន ១២០,០០០បាត ប៉ុន្តែឪពុករបស់សាម៉ីខ្លួនមានលទ្ធភាពបង់តែ៦០,០០០បាត ប៉ុណ្ណោះ។ ជនរងគ្រោះពុំមានការធានារ៉ាប់រងសុខភាពឬការធានាសង្គមអ្វីឡើយ ព្រោះជាពលករខុសច្បាប់។ អាស្រ័យដូចនេះតំណាង ស្ថានទូតបានស្នើទៅមន្ទីរពេទ្យយោគយល់ដល់ជនរងគ្រោះជាគ្រួសារទីទ័លក្រ។
មន្ទីរពេទ្យបានឯកភាពទទួលយកប្រាក់ដែលសាម៉ីខ្លួនមានចំនួន៦ម៉ឺនបាត និងឲ្យសាម៉ីខ្លួនសន្យាសងនៅពេល ណាដែលមានថវិកា (តំណាងមន្ទីរពេទ្យបញ្ជាក់ថា កិច្ចសន្យានេះគ្រាន់តែជួយបង្គ្រប់កិច្ចប៉ុណ្ណោះមន្ទីរពេទ្យ នឹងមិនបង្ខំទារប្រាក់ដែលនៅខ្វះនេះឡើយ)។ ថ្ងៃទែ៤ ខែវិចិ្ឆកា ពលកររងគ្រោះ បានត្រូវបញ្ជូនបញ្ជូនទៅវះកាត់នៅមន្ទីរពេទ្យមួយទៀតនៅក្រុងបាងកក។
គួរបញ្ជាក់ថា ពលករមីយ៉ាន់ម៉ា ដែលជាជនដៃដល់ ត្រូវបានសមត្ថកិច្ចចាប់ខ្លួនភ្លាមក្រោយពេលកើតហេតុ ហើយបច្ចុប្បន្នកំពុងស្ថិតនៅក្នុងមន្ទីរឃុំឃាំងរង់ចាំការកាត់ទោស។ ស្ថានទូត នឹងងរកមេធាវី ដើម្បីជម្រុញដំណើការកាត់ទោសជនល្មើសទៅតាមច្បាប់ ប៉ុន្តែមិនរំពឹងថាអាចទារសំណងពីជនល្មើសបានទេ ព្រោះជាពលករក្រីក្រដែរ។ ស្ថាន ទូត នឹងខិតខំទាមទារជាមួយនិយោជករបស់ពលកររងគ្រោះឲ្យជួយឧបត្ថម្ភថវិកាព្យាបាល៕
