(ភ្នំពេញ)៖ នៅល្ងាច ថ្ងៃសៅរ៍ទី៥ ខែវិច្ឆិកា នេះ សម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន នឹងចូលរួម ពិធីបិទការប្រកួតកីឡាជាតិ លើកទី១ នៅស្តាតអូឡាំពិក។ នេះ​បើយោងតាម Facebook Page ផ្លូវការរបស់សម្តេចតេជោ ហ៊ុន សែន នាយករដ្ឋមន្រ្តីកម្ពុជា បង្ហោះឲ្យដឹងនៅមុននេះបន្តិច។

សម្តេចតេជោ ហ៊ុន សែន បានមានប្រសាសន៍ទៀតថា សម្តេចសង្ឃឹម និងមានជំនឿជឿជាក់យ៉ាងខ្លាំងលើសមត្ថភាពរបស់កីឡាករ កីឡាការិនីកម្ពុជាគ្រប់រូបនៅក្នុងការ ដណ្តើមជោគជ័យធំៗជាច្រើនថែមទៀតសម្រាប់ជាតិ ជាពិសេស​នៅក្នុងការប្រកួតកីឡាស៊ីហ្គេមលើកទី៣២ នៅឆ្នាំ២០២៣ នៅក្នុងប្រទេសកម្ពុជា។

សម្តេចតេជោ មានប្រសាសន៍យ៉ាងដូច្នេះថា «ខ្ញុំនិងភរិយា នឹងចូលរួមនៅក្នុងពិធីបិទការប្រកួតកីឡាជាតិ លើកទី១ នៅស្តាតអូឡាំពិក។ តាមការប្រកួតប្រជែងអស់រយៈពេល ១០ថ្ងៃ កន្លងមកនេះ យើងសង្កេតឃើញថា កីឡាករ កីឡាការិនីមកពីតាមបណ្តាខេត្តក្រុង​ទាំងអស់បានបញ្ចេញ​នូវសមត្ថភាពក្នុងការប្រកកួត​ប្រជែង ប្រកបដោយដោយ ការទទួល ខុសត្រូវ គោរពវិន័យ និងក្រិតក្រម កីឡាបានល្អ​ (Fair Play). ច្បាស់ណាស់អ្នកដែលមាន​សមត្ថភាព គឺនឹងទទួលជ័យជំនះ ហើយយើងឈ្នះដោយកិត្តិយស​ថ្លៃថ្នូរដែលជាមោទន​ភាព​របស់កីឡាករខ្លួនឯងផង និងសម្រាប់ជាតិផង។ ខ្ញុំសង្ឃឹម និងមានជំនឿជឿជាក់យ៉ាងខ្លាំងលើ​សមត្ថភាពរបស់កីឡាករ កីឡាការិនីកម្ពុជាគ្រប់រូប​ នៅក្នុងការដណ្តើមជោគជ័យធំៗជាច្រើនថែមទៀត​សម្រាប់ជាតិ ជាពិសេស នៅក្នុងការប្រកួត​កីឡាស៊ីហ្គេមលើកទី៣២ នៅឆ្នាំ២០២៣ នៅក្នុងប្រទេសកម្ពុជាយើង»។

បន្ថែមពីលើនេះ ម្តេចតេជោ ហ៊ុន សែន ក៏បានថ្លែងអំណរគុណដល់​ប្រជាពលរដ្ឋខ្មែរទាំងអស់ ដែលបានចូលរួមលើក​ទឹកចិត្តគាំទ្រវិស័យ​កីឡាជាតិយ៉ាង​សស្រាក់សស្រាំ ហើយសម្តេច ក៏បានអរគុណ​គ្រូបង្វឹកទាំង អស់ដែលបានយកចិត្តទុកដាក់ហ្វឹកហ្វឺនកីឡាករ ទាំងអស់អោយមានសមត្ថភាពកាន់តែល្អខ្ពស់ឡើង។ សម្តេចតេជោថា «យើងត្រូវរួមដៃគ្នាបន្តជំរុញចលនាកីឡាជាតិ អោយកាន់តែរីកចម្រើនខ្លាំងឡើងនៅក្នុងប្រទេស»៕