(ភ្នំពេញ)៖ លោក ជេសស៉ី ម៉ាខល ជនជាតិអាមេរិក មានសញ្ជាតិខ្មែរ ទីប្រឹក្សាក្រសួងមហាផ្ទៃ បានប្រារព្ធខួបទី ៣០ឆ្នាំ ដែលលោកបានមកដល់ប្រទេសកម្ពុជា កាលពីថ្ងៃទី២៦ ខែមេសា ឆ្នាំ១៩៩៥។

លោក ជេសស៉ី គឺជាបុគ្គលមួយរូបក្នុងចំណោមជនបរទេស ដែលរស់នៅយូរៗជាងគេនៅកម្ពុជា និងជាជនបរទេសមួយរូបក្នុងចំណោមជនបរទេស ដែលចេះនិយាយភាសាខ្មែរយ៉ាងស្ទាត់ជំនាញ។ លោកបានមកដល់កម្ពុជា លើកដំបូង នៅឆ្នាំ១៩៩៥នោះ គឺមានគម្រោងរស់នៅតែមួយឆ្នាំទេ ប៉ុន្តែបន្ទាប់ពីរស់នៅបានមួយឆ្នាំដំបូង លោកបានគិតថា មានរឿងជាច្រើនត្រូវធ្វើនៅស្រុកខ្មែរ និងបានបន្តរស់នៅស្រុកខ្មែរតាំងពីពេលនោះតែម្តង។

លោក ជេសស៉ី បានមករស់នៅខ្មែរដំបូង ដោយសារលឺពីអ្វីបងប្អូនខ្មែរបានឆ្លងកាត់ និងលឺថារាជរដ្ឋាភិបាលបានអញ្ជើញនិងស្វាគមន៍មនុស្សផ្សេងៗ ដើម្បីកសាងប្រទេសជាតិឡើងវិញ។ នៅពេលនោះ លោកមិនបានប្រាកដថា អាចចូលរួមជួយអ្វីខ្លះ នៅក្នុងការកសាងប្រទេសជាតិឡើងវិញ លោកក៏បានមកស្រុកខ្មែរដើម្បីឈ្វេងយល់ពីអ្វីដែលអាចចូលរួមជួយបាន។

ក្នុងរយៈពេល ៣០ឆ្នាំនេះ លោក ជេសស៉ី ក៏បានមានស្នាដៃច្រើនគួរសម។ ១០ឆ្នាំដំបូង ដែលលោកបានរស់នៅស្រុកខ្មែរ លោកបានបង្កើតស្ថាប័នអប់រំ ហើយបើកសាលារៀនមួយចំនួន ដែលមានខ្លះមានដល់សព្វថ្ងៃ។

បន្ទាប់ពី ១០ឆ្នាំដំបូងនោះ លោក ជេសស៉ី ក៏បានក្លាយទៅជាអគ្គនាយក និងជាប្រធានក្រុមប្រឹក្សាភិបាលរបស់អង្គការក្រៅរដ្ឋាភិបាលមួយឈ្មោះ អង្គការកសាងមូលដ្ឋានជីវិតថ្មី ដែលជាអង្គការសប្បុរសធម៌តាមរយៈវិស័យអប់រំ។ តាមរយៈអង្គការនេះ ប្រជាពលរដ្ឋកម្ពុជា ក៏បានទទួលជំនួយ ការអប់រំ ការបណ្តុះបណ្តាល និងធនធានជាច្រើន។

នៅក្នុងពេល ១០ឆ្នាំ ដែលលោក ជេសស៉ី បានដឹកនាំអង្គការសប្បុរសធម៌ ក៏បានមានមនុស្សរាប់ម៉ឺននាក់ទទួលបានប្រយោជន៍ល្អៗពីលោកផងដែរ។
បន្ទាប់មករយៈពេល 10 ឆ្នាំចុងក្រោយនេះ លោកក៏បាននាំអ្នកវិនិយោគអន្តរជាតិមកវិនិយោគ ហើយប្រកបអាជីវកម្មនៅស្រុកខ្មែររាប់ពាន់នាក់ផងដែរ។

លោក ជេសស៉ី ក៏មានកេរ្តិ៍ឈ្មោះល្អ ជាមនុស្សដែលរួសរាយរាក់ទាក់ និងច្បាស់លាស់ក្នុងការងារ ព្រមទាំងពូកែវោហារ ជាពិសេសស្នេហាជាតិ។ លោកតែងតែនិយាយថា លោកមិនបោះបង់គោលបំណងដំបូង ដែលលោកមកខ្មែរដំបូង នៅឆ្នាំ១៩៩៥ ជាគោលបំណងដើម្បីកសាង និងអភិវឌ្ឍប្រទេសជាតិ គឺប្រទេសកម្ពុជា៕