(កំពត)៖ លោកឧត្តមសេនីយ៍ឯក ទូច ពលៈ ប្រធាននាយកដ្ឋាននគរបាលការពារព្រំដែនទឹក នៃអគ្គស្នងការដ្ឋាននគរបាលជាតិ បានរំលេចឡើងអំពីស្នាដៃសំខាន់ៗរបស់កម្លាំងនគរបាលការពារព្រំដែនទឹក ដែលសម្រេចបាននាពេលកន្លងទៅ ពិសេសឆ្នាំ២០២៤ ក្នុងការរួមចំណែកការពារសន្ដិសុខ សណ្ដាប់ធ្នាប់សាធារណៈ សុវត្ថិភាពសង្គម និងអធិបតេយ្យភាព បូរណភាពទឹកដី។

ស្នាដៃកម្លាំងនគរបាលការពារព្រំដែនទឹក ដែលត្រូវបានរំលេចឡើងនេះ ក្នុងឱកាសពិធីជួបសំណេះសំណាលក្រោមអធិបតីភាព នាយឧត្តមសេនីយ៍ ស ថេត អគ្គស្នងការនគរបាលជាតិ ជាមួយកម្លាំងនគរបាលការពារព្រំដែនប្រចាំទិសភូមិភាគ៣ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ។ ពិធីនេះ ត្រូវបានធ្វើឡើងនៅទីបញ្ជាការវរសេនាតូចការពារព្រំដែនទឹកលេខ២៤១ ស្ថិតក្នុងក្រុងបូកគោ ខេត្តកំពត នៅរសៀលថ្ងៃទី៥ ខែមេសា ឆ្នាំ២០២៥នេះ។

លោកឧត្តមសេនីយ៍ឯក ទូច ពលៈ បានអះអាងថា ក្រោមការដឹកនាំរបស់នាយឧត្ដមសេនីយ៍ ស ថេត អគ្គស្នងការនគរបាលជាតិ គួបផ្សំការចង្អុលណែនាំផ្ទាល់ពីនាយឧត្តមសេនីយ៍ ខេង សុមេធ អគ្គស្នងការរងនគរបាលជាតិ កងកម្លាំងនគរបាលការពារព្រំដែនទឹក បានខិតខំពុះពារគ្រប់ឧបសគ្គបំពេញតួនាទី ភារកិច្ចប្រកបដោយស្មារតីទទួលខុស ត្រូវខ្ពស់ និងទទួលបានលទ្ធផលដូចខាងក្រោម៖

* សហការយ៉ាងស្អិតរមួតជាមួយគណៈបញ្ជាការឯកភាពរដ្ឋបាលខេត្តជាប់មាត់សមុទ្រ និងកងយោធពលខេមរភូមិន្ទ ការពារបានយ៉ាងគង់វង្សនូវអធិបតេយ្យជាតិ បូរណភាពទឹកដី បញ្ចៀសបានអំពើភេរវកម្ម ឧក្រិដ្ឋកម្មឆ្លងដែនគ្រប់ប្រភេទ ព្រមទាំងបង្ការទប់ស្កាត់បានការប្រើប្រាស់ ទឹកដីកម្ពុជាប្រឆាំងនឹងប្រទេសជិតខាង។

* ឧបាយកលសកម្មភាពពួកក្រុមមាននិន្នាការប្រឆាំងជ្រុល និយមទាំងក្នុង និងក្រៅប្រទេស ត្រូវបានបង្ការ និងទប់ស្កាត់ប្រកបដោយប្រសិទ្ធភាព ដោយមិនទុកឱកាសឲ្យក្រុមជ្រុលនិយមទាំងនេះ ធ្វើព្យុះភ្លៀង បង្កចលាចលនៅតាមតំបន់ព្រំដែនគោក-ទឹកប្រទេសកម្ពុជា បានជាដាច់ខាត។

* ធានាបាននូវស្ថិរភាពសន្តិសុខ សុវត្ថិភាពជូនដល់ប្រជាពលរដ្ឋដែលរស់នៅប្រកបមុខរបរចិញ្ចឹមជីវិតនៅតាមតំបន់ព្រំដែនគោក-ទឹក និងភ្ញៀវមកកម្សាន្ដតាមកោះឆ្នេរ ព្រមទាំងបានជួយ សម្របសម្រួលបង្កលក្ខណៈងាយស្រួលឲ្យប្រជាពលរដ្ឋខ្មែរ បានឆ្លងដែនទៅប្រទេសជិតខាង ដើម្បី ពិនិត្យសុខភាព និងព្យាបាលជំងឺទៀតផង។ ទន្ទឹមនោះ ក៏បានជួយសង្គ្រោះដល់ជនរងគ្រោះដែល ជួបឧប្បទ្ទវហេតុផ្សេងៗ ដូចជាៈ លិចកទូក លិចប៉ាល់ និងជួយអន្តរាគមន៍ដឹកជញ្ជូនអ្នកមានជំងឺពី លើដែនកោះ មកកាន់ដីគោកជាដើម។

* បង្ក្រាបបទល្មើសធំៗ ដូចជា បទល្មើសគ្រឿងញៀន, កប៉ាល់ដឹកធ្យូងថ្ម ឆ្លងដែនដោយខុសច្បាប់, ទូកនេសាទជនជាតិវៀតណាមឆ្លងដែនមកនេសាទដោយខុសច្បាប់។ ក្រៅពីនោះ ក៏បានអប់រំប្រជាពលរដ្ឋឲ្យយល់ដឹងអំពីច្បាប់ និងបទបញ្ញាត្តិ ព្រំដែននានា ដើម្បីបង្ការ ទប់ស្កាត់ការឆ្លងដែនចេញ-ចូលដោយខុសច្បាប់។

លោកឧត្តមសេនីយ៍ឯក ទូច ពលៈ បានប្ដេជ្ញាចិត្តយ៉ាងមុតមាំ ដោយនៅតែបន្តឆន្ទៈក្នុងនាមជាកងកម្លាំងឈរធ្វើជារបងការពារខ្សែបន្ទាត់ព្រំដែន ធានាដាច់ខាតការពារ ឲ្យបាននូវអធិបតេយ្យជាតិ បូរណភាពទឹកដី និងសុខសន្តិភាពជូនសង្គមជាតិ៕