(ក្រចេះ)៖ រថយន្តកែច្នៃមួយគ្រឿងបើកបរក្នុងល្បឿនលឿនដល់ផ្លូវកែងបត់ចូលខ្វះការប្រុងប្រយ័ត្នក៏ជ្រុលទៅបុកម៉ូតូបណ្ដាលឲ្យអ្នកបើកបរម៉ូតូស្លាប់ម្នាក់ និងរងរបួសធ្ងន់ម្នាក់ រីឯអ្នកបើកបរត្រូវបានសមត្ថកិច្ចឃាត់ខ្លួន បញ្ជូនទៅកាន់តុលាការ។

ករណីគ្រោះថ្នាក់ចរាចរណ៍ខាងលើនេះ បានកើតឡើងលើផ្លូវលំក្រាលគ្រួសក្រហមនៅចំណុចផ្លូវបំបែកប៉ុស្តិ៍លេខ៥ ស្ថិតក្នុងភូមិគោលាប់ ឃុំគោលាប់ ស្រុកចិត្របុរី ខេត្តក្រចេះ កាលពីរសៀលថ្ងៃទី៤ ខែមេសា ឆ្នាំ២០២៥។

សមត្ថកិច្ចបានឲ្យដឹងថា នៅថ្ងៃកើតហេតុរថយន្តកែច្នៃបើកបរដោយយុវជនម្នាក់ឈ្មោះ នួច ណយ អាយុ១៩ឆ្នាំ មុខរបរកម្មករឡឥដ្ឋ មានទីលំនៅនៅភូមិបឹងរុន ឃុំសំបុកស្រុកចិត្របុរី បើកក្នុងល្បឿនលឿន លុះដល់ចំណុចកើតហេតុផ្លូវកែង បានបត់ចូលដោយខ្វះការប្រុងប្រយ័ត្នក៏ជ្រុលទៅបុកម៉ូតូគ្រឿងម៉ាក់ហុងដាទ្រីម ពណ៌ខ្មៅ ពាក់ស្លាកលេខ បន្ទាយមានជ័យ 1K-9440 ធ្វើដំណើរពីទិសលិចទៅខាងកើតបណ្តាលឲ្យ លោកយាយអាយុ៧១ឆ្នាំ និងចៅស្រីរងរបួសធ្ងន់ ហើយបានស្លាប់ពេលបញ្ជូនដល់មន្ទីពេទ្យបង្អែកខេត្តក្រចេះ។

ជនរងគ្រោះទាំង២នាក់ឈ្មោះហឿន ស្រីពេជ្រ ភេទស្រី អាយុ២១ឆ្នាំ (របួសធ្ងន់) មានទីលំនៅភូមិទួលមនោរម្យ សង្កាត់ក្រគរ ក្រុងក្រចេះ និងលោកយាយ ឯក សំអាត ភេទស្រី អាយុ៧១ឆ្នាំ (ស្លាប់) មានទីលំនៅភូមិឃុំជាមួយគ្នា។

អ្ន​កបើករថយន្តឈ្មោះ ទូច ណច អាយុ១៩ឆ្នាំ ត្រូវបានឃាត់ខ្លួននៅអធិការដ្ឋាននគរបាលស្រុកចិត្របុរី ដើម្បីកសាងសំណុំរឿងបញ្ជូនទៅការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តក្រចេះ
ចំណែកវត្ថុតាងរថយន្តកែច្នៃ១គ្រឿង និងម៉ូតូ១គ្រឿង យកមករក្សាទុកនៅប៉ុស្តិ៍នគរបាលរដ្ឋបាលគោលាប់៕